Saud Arabystanynyň çempionaty SPL-de möwsümiň jemleýji tapgyrynda “Al Nassr” topary öz meýdançasynda “Al-Ittihad” toparyndan 4-2 hasabynda üstün çykdy. Duşuşykda 2 gol geçiren 39 ýaşyndaky super ýyldyz Kristiano Ronaldonyň çempionatdaky gollarynyň sany 35-e ýetdi. Portugaliýaly ýyldyz SPL-de bir möwsümde iň köp gol geçiren oýunçy rekordynyň täze eýesi boldy. Bu ugurda ozalky rekord “Al-Ittihad” toparynyň hüjümçisi Abderezzak Amdalla degişlidi (34 gol).
Şeýle-de, Ronaldo Angliýadyr Ispaniýadan (3 gezek) hem-de Italiýadan soň Saud Arabystanynda iň köp gol geçiren oýunçy boldy. Ol futbolyň taryhynda 4 ýokary ligada iň köp gol geçiren oýunçy bolmagy başaran ilkinji futbolçy hökmünde hasaba alyndy.
