Dubaýda “Aeternitas” sagady berkidilen kaşaň gökdiräniň gurluşygyny 2027-nji ýylda tamamlamak meýilleşdirýärler. Binada bir otagly öýüň bahasy 435 müň dollara deň bolar diýip, “hi-tech.mail.ru” ýazýar. “Aeternitas” gökdiräni resmi taýdan dünýäniň iň belent sagatly ýaşaýyş diňi bolar. Beýikligi 450 metre deň bolan bu gökdirän Beýik Britaniýadaky “Big-Benden” dört esse, ABŞ-daky iň beýik ýaşaýyş binasy “Sentral-Park-Tauerden” 22 metr gysga bolar.
Mundan başga-da, bu bina Mekgedäki “Makkah Clock” diňinden soň dünýäniň ikinji beýik sagatly gökdiräni bolar. Emma ondan tapawutlylykda, “Aeternitas” gökdiräninde ýaşaýyş öýleri bolar. Gökdiräniň taslamasy Dubaýda ýerleşýän “London Gate” we Şweýsariýanyň nepis sagatlary öndüriji “Frank Müller” kompaniýalarynyň arasyndaky hyzmatdaşlygyň netijesidir. Binadaky sagadyň beýikligi 40 metre, ini 30 metre ýeter diýlip garaşylýar, bu bolsa 6 kilometr uzaklykdan sagady görmäge mümkinçilik berer.
Beýik gatly binada bir-üç otagly 649 sany kaşaň ýaşaýyş öýlerini ýerleşdirmek meýilleşdirilýär. Olaryň bahasy taslamanyň ajaýyplygyna gabat gelýär. 2027-nji ýylda öýleriň açarlaryny bagtly eýelerine gowşurmak meýilleşdirýärler. Gökdiräniň ady latyn dilinden terjime edilende, “Ebedilik” diýen manyny berýär.
