Germaniýada dowam edýän 17-nji Ýewropa çempionatynda 2-nji çärýek finalçy ýer eýeleri Germaniýanyň ýygyndysy boldy. Dortmunddaky “Westfalen” stadionynda oýnalan bu duşuşyk wakalara baý boldy. Ilkinji minutlarda Şlotterbegiň goly derwezeçiniň garşysyna oýnuň düzgüniniň bozulandygyny göz öňünde tutan emin bu goly hasaba almady. Duşuşygyň emini Maýkl Oliwer oýnuň 35-nji minutynda ýagyş ýagyp ýyldyrymyň çakyp başlamagyndan soň oýny togtatdy. Şol pursatda-da wagtal-wagtal jöwenek hem ýagyp, ýagyş hasam güýçlendi. 1 sagada golaý wagtdan soň duşuşyk täzeden başlandy.
Oýnuň 48-nji minuty duşuşygyň ykbalyny kesgitlän pursat boldy. Daniýaly goragçy Anderseniň goly millimetrlik hasaplamalara görä, ofsaýt diýlip, hasaba alynmady. Sähel salymdan soň, Germaniýanyň hüjüminde top şol Anderseniň eline degendigini VAR baş emine duýdurýar. Oliwer hem şol pursata ekrandan seredip, penalti urgusyny belledi. Ony-da Kai Hawerts dürs urup, hasaby açdy. Duşuşygyň 68-nji minutynda-da Jamal Musiala toparynyň 2-nji goluny derwezä girizdi. Galan pursatlarda-da hasap üýtgemedi we Germaniýanyň ýygyndysy çempionatyň çägindäki 30-njy ýeňşini gazandy.
