Germaniýaly meşhur tälimçi Kristof Daum 70 ýaşynyň içinde aradan çykdy. 1953-nji ýylyň 24-nji oktýabrynda Gündogar Germaniýada dünýä inen Daum futbolçylyk karýerasyny “Aýntraht Duisburg” hem-de “Köln II” klublarynda geçirdi. 1986-njy ýylda tälimçilige başlan Daum “Köln” (1986-1990, 2006-2009), “Ştutgart” (1990-1993), “Beşiktaş” (1994-1996, 2001-2002), “Baýer” (1996-2000), “Austria” (2002-2003), “Fenerbahçe” (2003-2006, 2009-2010), “Aýntraht Frankfurt” (2011), “Klub Brýugge” (2011-2012), “Bursaspor” (2013-2014) klublaryna, şol sanda Rumyniýanyň milli ýygyndysyna tälim berdi. Ol 1992-nji ýylda “Ştutgart bilen “Bundesligada”, 1995-nji ýylda “Beşiktaş”, 2004-nji we 2005-nji ýyllarda “Fenerbahçe” bilen Türkiýäniň “Süper Liginde”, 2003-nji ýylda “Austria” bilen Awstriýanyň “Bundesligasynda” çempionlyklar gazandy. Şol sanda kubok hem-de Super Kubok ýaryşlarynda ýeňiji bolan Daum “Köln” bilen 2, “Baýer” bilen 3, “Fenerbahçe” bilen 1, “Klub Brýugge” bilenem 1 gezek milli çempionatlarda kümüş medala mynasyp boldy.
Soňky ýyllarda düwnük keselinden ejir çeken Daum tälimçilik karýerasynda 1005 duşuşygyň 530-synda ýeňiş gazandy. Daum 2000-nji ýylda Germaniýanyň milli ýygyndysynyň tälimçiligine-de bellenmäge golaý gelipdi. Ýöne ýüze çykan käbir wakalardan soň, bu wezipä başlamazdan taşlamaly bolupdy.
