16-njy sentýabrda Türkmenistanyň Daşary işler ministrliginde 10-11-nji sentýabrda geçirilen Türkmenistanyň maýa goýum forumynyň we sergisiniň (TIF 2024) netijelerine bagyşlanan brifing geçirildi.
Bu çärä Türkmenistanyň degişli ministrlikleriniň we pudak edaralarynyň, ýurduň Ylymlar akademiýasynyň ýolbaşçylary we wekilleri, Türkmenistanda akkreditirlenen diplomatik wekilhanalaryň we halkara guramalarynyň wekilhanalarynyň ýolbaşçylary we işgärleri, ýerli we daşary ýurt habar beriş serişdeleriniň wekilleri gatnaşdy.
Brifingiň dowamynda Türkmenistanyň Daşary işler ministri Raşid Meredow döwlet edaralarynyň, halkara guramalarynyň, maliýe institutlarynyň, şeýle hem onlarça ýerli we daşary ýurt kompaniýalarynyň wekillerini bir ýere jemlän Türkmenistanyň maýa goýum forumynyň (TIF 2024) netijeliligini belläp geçdi.
Çykyşda özara bähbitli esasda maýa goýum hyzmatdaşlygy üçin täze mümkinçilikler açylýan ýurt bolan Türkmenistanyň senagat we innowasiýa ösüş ýolundaky anyk ädimleri we giň gerimli özgertmeleri hem bellenildi.
Brifingde maýa goýum forumy bilen ugurdaşlykda bolup geçen wakalara, hususan-da, Türkmenistanyň Prezidentiniň, şeýle-de Türkmenistanyň Halk Maslahatynyň Başlygy Gurbanguly Berdimuhamedowyň gatnaşmagyndaky energetika, ulag-kommunikasiýa we logistika desgalarynyň açylyş hem-de düýbüni tutmak dabaralaryna aýratyn ähmiýet berildi.
Çärede Hindistan Respublikasynyň we Hytaý Halk Respublikasynyň Türkmenistandaky Adatdan daşary we Doly ygtyýarly Ilçileri, Owganystanyň Türkmenistandaky Ilçihanasynyň wekili, halkara guramalarynyň we maliýe institutlaryň ýolbaşçylary hem çykyş etdiler.
Daşary ýurtly myhmanlar Türkmenistan tarapyndan amal edilýän bu ädimleriň diňe bir ýurduň durmuş-ykdysady ösüşine däl-de, eýsem sebit we tutuş dünýä bähbidine gönükdirilendigini, şeýle hem Durnukly ösüş maksatlaryna ýetmek üçin hem möhüm şertdigini bellediler.
