AFK Çagyryş Ligasynda çykyş edýän ýurdumyzyň çempiony “Arkadag” topary toparçadaky 3-nji duşuşygyny geçirdi. Toparçadaky duşuşyklaryň merkezileşdirilen görnüşde geçirilýän ýaryşynda ildeşlerimiz Kuweýtde ýerli “Al-Arabi” topary bilen duşuşdy. Her ýarymy özboluşly çekeleşikli geçen oýunda ýer eýeleri 41-nji minutda Halafyň goly bilen öňe saýlandy. 49-njy minutda Obud hasaby 2-0-a çykardy. 70-nji minutda Habba penaltini dürs urup, hasap 3-0 boldy. Ýöne ruhdan düşmedik ildeşlerimiz soňky minutlarda 2 gol geçirmegi başardy. Begenç Akmämmedowyň 84-nji minutda we penaltiden 90+7-nji minutda geçiren gollary “Arkadag” toparynyň çärýek finala çykmagy üçin ýeterlik boldy. Duşuşygyň 71-nji minutynda ýer eýelerinden Ýosef Alşammari Majed gyzyl kart aldy.
“Arkadag” topary 3-2 hasabynda ýeňlişe sezewar boldy. Bu “Arkadag” toparynyň resmi duşuşyklardaky ilkinji ýeňlişi hökmünde hasaba alyndy. Ýöne muňa garamazdan, “Arkadag” topary toparçada 1-nji orunda galyp, çärýek finala çykmagy başardy.
Toparçadaky beýleki duşuşykda bolsa Gyrgyzystanyň “Abdyş-Ata” topary Maldiwleriň “Maziýa” toparyny 3-0 hasabynda ýeňdi.
Netijede, 3 toparyň hem 6 utugy bolup, soňlugy bilen, 3 toparyň özara oýunlary esasynda “Arkadag” topary +1 gol aratapawudy bilen öňe saýlanyp (2-0, 2-3), toparçada 1-nji orny eýeledi. “Al-Arabi” toparynyň 0 (0-1, 3-2), “Abdyş-Ata” toparynyň-da -1 (1-0, 0-2) gol aratapawutlary ýüze çykdy. Şunlukda, “Arkadag” topary ilkinji gezek gatnaşýan ýaryşynda çärýek finala çykmagy başardy. Ýurdumyzyň çempiony çärýek finalda Hindistanyň “Ist Bengal” kluby bilen duşuşar. Duşuşyklar geljek ýylyň mart aýynda geçiriler. 1-nji duşuşykda 5-nji martda Hindistanda, jogap oýny-da 12-nji martda Türkmenistanda oýnalar.
Mälim bolşy ýaly, Kuweýt döwletiniň paýtagty Kuweýt Sitide geçirilýän “B” toparçanyň duşuşyklarynda “Arkadag” topary ilki Maldiwleriň “Maziýa” topary bilen duşuşypdy. Hindistanly Ramaçandran Wenkateşiň eminlik eden oýnunda ilki bilen “Maziýa” topary 45-nji minutda Kantilýananyň goly esasynda öňe saýlandy. Ýöne 2-nji ýarymda has erjel oýun görkezen ildeşlerimiz ýeňiş gazanmagy başardy. Oýnuň 66-njy minutynda Didar Durdyýew hasaby deňlese, 10 minutdan soňam Altymyrat Annadurdyýew ýeňiş goluny geçirdi. Şunlukda, “Arkadag” topary halkara ýaryşyndaky ilkinji duşuşygynda 2-1 hasabynda ýeňiş gazandy.
Ýer eýeleri “Al-Arabi” bilen Gyrgyzystanyň “Abdyş-Ata” toparlarynyň arasyndaky oýunda-da Merkezi Aziýanyň wekili Erbol Atabaýewiň 62-nji minutda geçiren ýeke-täk goly esasynda 1-0 hasabynda üstün çykdy.
Toparçadaky 2-nji duşuşyklaryň 2-si hem 2-0 hasaplar bilen tamamlandy. “Arkadag” topary Gyrgyzystanyň “Abdyş-Ata” topary bilen duşuşyp, 2-0 hasabynda ýeňlişe sezewar etdi. Ildeşlerimiziň doly artykmaçlygynda geçen oýunda “Arkadag” toparyna ýeňiş getiren gollary 26-njy minutda Şamämmet Hydyrow bilen 50-nji minutda Abdy Bäşimow derwezä girizdi.
Toparçanyň beýleki duşuşygy hem şol hasap bilen tamamlanyp, “Al-Arabi” topary “Maziýny” Majed we Halafyň 7-nji we 8-nji minutlarda geçiren gollary esasynda 2-0 hasabynda ýeňdi.
AFK Çagyryş Ligasy “B” toparça (Kuweýt Siti, Kuweýt)
1-nji duşuşyklar:
“Al-Arabi” – “Abdyş-Ata”: 0-1, “Arkadag” – “Maziýa”: 2-1
2-nji duşuşyklar:
“Abdyş-Ata” – “Arkadag”: 0-2, “Maziýa” – “Al-Arabi”: 0-2
3-nji duşuşyklar:
“Al-Arabi” – “Arkadag”: 3-2, “Maziýa” – “Abdyş-Ata”: 0-3
| 1 | “Arkadag” | 3 | 2 | 0 | 1 | 6 | 4 | +2 | 6 |
| 2 | “Al-Arabi” | 3 | 2 | 0 | 1 | 5 | 3 | +2 | 6 |
| 3 | “Abdyş-Ata” | 3 | 2 | 0 | 1 | 4 | 2 | +2 | 6 |
| 4 | “Maziya” | 3 | 0 | 0 | 3 | 1 | 7 | −6 | 0 |
