UEFA Çempionlar Ligasynda 5-nji duşuşyklar geçirilip, oýnalan 18 oýunda 67 gol hasaba alyndy. Sişenbe günki oýunlarda 40 gol geçirilip, UEFA-nyň bu ýaryşynda 10 ýyldan soň şeýle statistika gaýtalandy. 7 oýunda myhmanlar, 8 oýunda-da ýer eýeleri ýeňiş gazandy. 1-i golsuz 3 duşuşyk deňlikde tamamlandy. 5 klub bilen wekilçilik edýän “Bundesliganyň” 3 topary ýeňip, 2 topary-da ýeňlişe sezewar boldy. Şonuň ýaly italýan klublarynyň hem 3-si ýeňdi, 1-i utulsa, 1-i deňme-deň oýnady. Ispan klublarynyň 2-si ýeňip, 2-si utuldy. Iňlis toparlary bu tapgyry ýeňlişsiz tamamlap, olaryň 2-si ýeňiş gazandy, 2-si bolsa deňme-deň netije görkezdi. Fransuz klublarynyň diňe 1-i ýeňse, 3-si ýeňlişe sezewar boldy.
5-nji oýunlardan soň “Liwerpul” ýeke utuk hem ýitirmän gelýär. Olar şu wagta çenli diňe 1 gol geçirtdi we indiki tapgyra çykmaga hukuk gazandy. Olaryň azyndan ilkinji 24 toparyň biri boljakdygy anyk belli boldy. “Inter” topary bu tapgyrda-da derwezesini goldan goramagy başardy we olar häzirki wagtda gol geçirtmedik ýeke-täk topardyr. 5-nji duşuşyklardan soň diňe 3 topar ýeňlişsiz ýoluny dowam edýär. Olar “Liwerpul”, “Inter” hem-de “Atalanta” klublarydyr. “Monako”, “Sporting”, “Brest” toparlary bolsa ilkinji gezek ýeňildiler.
Şeýle-de, bu tapgyrda-da ýeňlişe sezewar bolan “Leipsig”, “Slowan Bratislawa” hem-de “Ýang Boýz” toparlary galan duşuşyklarynda ýeňiş gazansa-da, olara ilkinji 8-lige düşmek başartmaz.
5-nji duşuşyklardan soň çempionlygyň dalaşgärlerinden, soňky çempion “Real Madridiň” 24-nji, şol sanda PSŽ-niň 25-nji bolmagy aýratyn bellärliklidir.
