PDF
Futbol boýunça Türkmenistanyň Kubogyna “Arkadag” topary mynasyp boldy. “Aşgabat” köp ugurly stadionda oýnalan finalda “Arkadag” bilen “Ahal” toparlary duşuşdy. Çekeleşikli geçen oýunda “Arkadag” topary 1-0 hasabynda ýeňiş gazandy. Duşuşykdaky ýeke-täk goly 45-nji minutda Begenç Akmämmedow öz adyna ýazdyrdy. Şunlukda, Türkmenistanyň Kubogyna bassyr 2-nji gezek mynasyp bolan “Arkadag” topary geçen ýylam finalda “Ahal” bilen duşuşyp, 3-0 hasabynda ýeňiş gazanypdy. “Arkadag” topary Türkmenistanyň Kubogyny 1-den köp ýa-da azyndan 2 gezek gazanan 8-nji topar hökmünde hasaba alyndy.
Ýurdumyzyň çempiony “Arkadag” topary yzly-yzyna 2-nji möwsümi-de goşa üstünlik bilen – Milli liganyň çempionlygy hem-de Türkmenistanyň Kubogynyň ýeňşi bilen tamamlady. Golaýda “Arkadag” topary Türkmenistanyň Naýbaşy Kubogyny hem eýeläpdi.
“Ahal” topary soňky 4 ýylda 3-nji gezek finalda ýeňlişe sezewar bolup, olar 2022-nji ýylda ýeňiş gazanypdy.
Iň köp “Köpetdag” eýeledi
1993-nji ýyldan bäri geçirilip gelinýän Türkmenistanyň Kubogy ýaryşynda şu wagta çenli 15 klub finala çykyp, şolaryň 12-si azyndan 1 gezek ýeňiş gazandy. Kubogy iň köp “Köpetdag” topary eýeläp, paýtagtlylar 7 gezek kubogyň ýeňijisi boldy (1993, 1994, 1996/97, 1999, 2000, 2001, 2018). “Köpetdag” topary 4 saparam (1995, 2005, 2006, 2020) finalda asgyn geldi. “Altyn asyr toparynyň 7 finalda 5 ýeňşi bolup (2009, 2015, 2016, 2019, 2020 – 2010, 2013), olar bu babatda 2-nji orunda barýarlar. “Nebitçi” (2003, 2004, 2010, 2012) bilen “Ahal” (2013, 2014, 2017, 2022) toparlary kubok ýaryşynda möwsümi 4 gezek begençli tamamladylar. Olaryň ikisi 4 gezegem finalda ýeňildiler (1998, 1999, 2001, 2014 – 2019, 2021, 2023, 2024). “Arkadag” toparyndan öň “Şagadam” (2007, 2021) “Merw” (2005, 2008), “Ýedigen” (2006, 2011) toparlary 2 gezek kubogy gazanypdylar. “Şagadam” 4 (2002, 2015, 2017, 2022), “Merw” 3 (1993, 2007, 2009), “Ýedigen” bolsa 2 (2008, 2012) gezek finalda utulypdy. “Nisa” (1998), “Turan” (1995) hem-de “Garagum” (2002) toparlary-da kubogy 1 gezek eýelemegi başardy. “Nissa” finalda 3 (1996/97, 2000, 2003), “Turan” 1 (1994) gezek ýeňlişe sezewar boldy. Şeýle-de, “Aşgabat” topary 2 (2011, 2016), “Asudalyk” (2004) hem-de “Energetik” (2018) toparlary 1 gezek finala çykyp, garşydaşlaryndan asgyn geldi.
