PDF
Amerikanyň Birleşen Ştatlarynda edebiýat, dramaturgiýa, saz we žurnalistika ugurlary boýunça 2026-njy ýylyň Pulitser baýragynyň ýeňijileri yglan edildi. Laureatlaryň doly sanawy baýragyň resmi saýtynda çap edildi.
“Çeper edebiýat” (Fiction) kategoriýasynda Daniel Krausyň “Perişdäniň syndyrylmagy” (Angel Down) romany ýeňiji boldy. Birinji jahan urşy baradaky bu eser allegoriýany, jadyly realizmi we ylmy fantastikany özünde jemleýän özboluşly kompozisiýadyr.
“Dramaturgiýa” (Drama) kategoriýasynda Bess Woluň “Azat ediş” (Liberation) pýesasy bellenildi. Eser 1970-nji ýyllarda zenanlaryň hukuklary baradaky düşünjeliligi ýokarlandyrmak boýunça toparlaryň alyp baran işlerini öwrenýär.
“Taryhy eser” (History) kategoriýasynda Jill Lepor “Biz – halk: ABŞ-nyň Konstitusiýasynyň taryhy” (We the People: A History of the U.S. Constitution) atly işi bilen laureat boldy.
“Biografiýa” kategoriýasynda Amanda Weýll “Buýsanç we lezzet: Rewolýusiýa döwrüniň Skaýler uýalary” (Pride and Pleasure: The Schuyler Sisters in an Age of Revolution) atly kitaby bilen ýeňiş gazandy. Bu eser Amerikanyň rewolýusiýasynyň wakalarynyň fonunda ABŞ-nyň taryhynda yz galdyran niderland asylly iri ýer eýeleriniň iki gyzy baradaky biografiýadyr.
“Poeziýa” (Poetry) ugrunda Juliana Spar Ars Poeticas atly goşgular ýygyndysy bilen ýeňiji boldy. Kitapda awtor öz şahsy tejribesi arkaly poeziýa bolan garaýşyny çeperçilik görnüşi, jemgyýet we syýasat hökmünde täzeden öwrenýär.
Saz sungaty kategoriýasynda Pulitser baýragy Gabriela Leni Franka “Pikaflor: Geljegiň rowaýaty” (Picaflor: A Future Myth) atly eseri üçin berildi. Eser Kaliforniýadaky tokaý ýangynlaryna garşy göreş we And daglarynyň rowaýatlary esasynda döredildi.
“The New York Times” neşiri üç sany baýraga mynasyp boldy. Redaksiýa “Derňew žurnalistikasy” nominasiýasynda, Maşa Gessen “Sütünler” kategoriýasynda, fotosuratçy Saher Algorra gyzgyn nokatlarda düşüren suratlary üçin ýeňiji boldular.
Žurnalist Juli K. Braun Jeffri “Adyllygyň sökülmegi” (Perversion of Justice) atly derňewler tapgyry üçin ýörite baýraga mynasyp boldy.
Pulitser baýragy — neşirçi Jozef Pulitser tarapyndan esaslandyrylan, žurnalistika, edebiýat, dramaturgiýa we saz ugrunda ABŞ-nyň iň abraýly baýraklarynyň biridir. Ol 1917-nji ýyldan bäri her ýyl gowşurylyp gelnip, ýeňijilere 15 müň dollar möçberinde pul sylagy berilýär.
