ABŞ-da geçirilmegine sanlyja gün galan Kongresiň aralyk saýlawlarynyň öňýanynda öňki saýlawlarda wada berlen özgerişlere bolan ynamyň peselmegi bilen baglylykda, syýasy ýagdaýlarda ep-esli üýtgeşmeler synlanylýar. Bu barada metbugat serişdelerinde habar berilýär. Aşaky palatanyň – Wekiller palatasynyň ähli 435 ornuna we Senatyň 35 ornuna geçirilýän bu saýlawlaryň netijeleri diňe bir Waşingtonyň däl, eýsem halkara syýasatynyň hem geljekki ugurlaryny kesgitlemäge uly täsir eder diýlip garaşylýar.
Häzirki wagtda Respublikaçylar partiýasynyň Wekiller palatasynda 219 we 214, Senatda bolsa 53 we 47 orunlyk utuk bilen agramlylyk edýändigi bellenilýär. Şeýle-de bolsa, synçylar mundan iki ýyl öň saýlawçylaryň goldawyna eýe bolan syýasy ugra bolan garaýşyň soňky döwürde üýtgeýändigini belleýärler. Saýlaw sebitlerinde geçirilýän sorag-jogaplar saýlawçylaryň garaýşynda täze ýagdaýlaryň ýüze çykýandygyny görkezýär.
Ýurtdaky ykdysady ýagdaý saýlawçylaryň sesini kesgitleýän esasy şertleriň biri hökmünde galýar. Halkara gatnaşyklarynda ýüze çykýan ýagdaýlar hem jemgyýetçilik pikirlenmelerinde öz beýanyny tapýar. Ýakyn Gündogardaky we beýleki sebitlerdäki syýasy durnuksyzlyklar, şeýle hem dünýä ykdysadyýetindäki ýagdaýlar saýlawdan öňki ses berişliklere öz täsirini ýetirýär. Şunuň bilen birlikde, syýasy partiýalaryň ýolbaşçylary saýlawdan öňki çykyşlarynda öz maksatnamalaryny tanyşdyrmagy dowam etdirýärler.
Synçylaryň bellemegine görä, Respublikaçylaryň goldaw bazasyny saklap galmak ugrundaky yzygiderli tagallalaryna garamazdan, Demokratlar partiýasynyň wekilleri Kongresiň aşaky palatasynda agramlylygy eýelemek üçin mümkinçiliklerini artdyrýarlar. Senatdaky orunlar üçin hem aýratyn dartgynly bäsleşik geçirilýär. Seljermelere görä, birnäçe ştatlarda saýlawyň netijeleri öňünden bellenip boljak derejede däl.
Saýlawlaryň soňky netijeleri ýurduň içki we daşary syýasatynyň geljekki iki ýyllyk ugruny kesgitlemekde möhüm tapgyr bolup durýar. Syýasatçylar we metbugat wekilleri saýlaw güni geçiriljek ses berişligiň netijelerine uly üns bilen garaşýarlar.

Gyzykly bolup bilerЕЩЕ ОТ АВТОРА