Hormatly Prezidentimiziň taýsyz tagallalary netijesinde, ýurdumyzyň ykdysadyýetiniň kuwwatyny has-da berkitmek, daşary ýurtlardan getirilýän önümleriň ornuny tutýan önümçilikleri ýola goýmak babatda giň gerimli işler alnyp barylýar. Bu ugurda alnyp barylýan döwlet maksatnamalaryna hususy pudagyň wekilleri hem öz mynasyp goşandyny goşýarlar.
Berkarar döwletimiziň bagtyýarlyk döwründe ýurdumyzda giňden bellenilen Milli bahar baýramy – Halkara Nowruz gününiň öňüsyrasynda asylly däbe eýerilip, Diýarymyzyň dürli künjeginde açylyş dabaralary ýaýbaňlandyryldy.
Ahal welaýatynyň Ak bugdaý etrabynda hususy işewürlige degişli iki senagat desgasynyň – ýuwujy serişdeleri hem-de polipropilen gaplary öndürýän häzirki zaman kärhanalarynyň açylyş dabaralary boldy.
Ahal welaýatynyň häkiminiň orunbasary Serdar Berdimuhamedowyň, Senagatçylar we telekeçiler birleşmesiniň, ýerli häkimiýet edaralarynyň wekilleriniň, hormatly ýaşulularyň, ýaşlaryň, köp sanly ýaşaýjylaryň gatnaşmagynda täze desgalar ulanmaga berildi. Täze desgalaryň biri ýylda ýuwujy serişdeleriň 50 tonnasyny öndürmäge niýetlenen kärhanadyr. Ýerli gurluşyk kompaniýasy tarapyndan bina edilen senagat desgasynyň düzüminde Türkmenistandan, şeýle hem Türkiýeden, Hindistandan, Hytaýdan, Germaniýadan, Daniýadan we Malaýziýadan getirilýän çig malyň hilini we ahyrky önümiň hilini barlamak üçin niýetlenen merkezi barlaghana hereket edýär. Bu ýerde iş orunlarynyň 150-si döredildi. Bu kärhana sebitde ýuwujy serişdeleri öndürýän iň iri desga bolup durýar, munuň özi ýokary hilli ýuwujy serişdeler bilen diňe bir içerki bazarlary üpjün etmek bilen çäklenmän, şolary eksport etmäge hem mümkinçilik berer.
Bu etrapda ulanmaga berlen ýene bir desga polipropilen matasyndan sygymy 300 kilogramdan 3 tonna çenli bolan iri göwrümli gaplary öndürmek boýunça “Bir Dünýä” hojalyk jemgyýetiniň kärhanasydyr. Bu kärhana ýylda bir million halta öndürmäge deň bolan önümçilik kuwwatynda işe girizildi, geljekde bolsa bu görkeziji iki esse artdyrylar hem-de gury ürgün azyk we azyk däl önümleri hem-de serişdeleri saklamak we ibermek üçin ýokary hilli polipropilen gaplar bilen içerki hem-de daşary ýurtly sarp edijileri üpjün eder. Kärhananyň eýeleýän umumy meýdany 15700 inedördül metre deň bolup, Awstriýanyň “Starlinger” kysymly iň döwrebap enjamy bilen üpjün edildi. Türkmenbaşydaky nebiti gaýtadan işleýän zawodlar toplumy gaplary öndürmek üçin çig malyň 95 göterimini üpjün eder, bu bolsa önümiň özüne düşýän gymmatyny peseltmäge we taýýar önümiň hilini ýokarlandyrmaga oňyn şert döreder.
Şeýle hem Mary welaýatynda ýyladyşhana hem-de süýji-köke önümlerini öndürýän kärhana açylyp, ulanmaga berildi. Mary şäherindäki döwrebap ýyladyşhana “Nahal” hem-de “Kerwen gurluşyk” hojalyk jemgyýetleri tarapyndan 6 gektar meýdanda guruldy we ýylda 1 müň 200 tonna gök önümleri ýetişdirmäge niýetlenendir.
Mary – Aşgabat awtomobil ýolunyň 9-njy kilometrinde ýurdumyzyň Senagatçylar we telekeçiler birleşmesiniň agzasy bolan “Täze aý önümleri” hojalyk jemgyýetiniň süýji-köke önümlerini öndürýän täze kärhanasynda bir günde süýji-köke önümleriniň 92 tonnasyny – kökeleriň, şokoladlaryň we waflileriň jemi 63 görnüşini öndürmäge ukyplydyr. Önümçilik bölümlerinde 250-den gowrak işgär zähmet çeker. Kärhananyň doly kuwwatyna çykmagy bilen, onda öndürilýän önümleri hem daşary ýurtlara ibermek maksat edinilýär.
Jeren WELIHANOWA,
S. A. Nyýazow adyndaky TOHU-nyň talyby.
