Ýeňil atletika boýunça geçirilýän Göwher liga (Diamond League) ýaryşynyň nobatdaky tapgyrynda taryhy rekord goýuldy. Bäsleşigiň Rimde geçirilen tapgyrynda syrykly bökmekde açyk meýdançadaky dünýä rekordy täzelendi. Şwesiýaly 20 ýaşyndaky Armand Duplantis 2-nji synanyşygynda 6,15 metr beýiklige böküp, rowaýaty Sergeý Bubkanyň 26 ýyllyk rekordyny täzelemegi başardy. Bubka 1994-nji ýylda Italiýanyň Sestrier şäherinde geçirilen ýaryşda 6,14 metrlik beýiklige böküp, rekord goýupdy. Şu möwsümde 8-nji gezek 6 metrden ýokary bökmegi başaran Duplantis bu ugurda-da öz rekordyny ösdürdi. Duplantis şu ýylyň fewral aýynda-da ýapyk desgada 6,18 metr beýiklige böküp, fransiýaly Reno Lawilýeniň rekordyny hem täzeläpdi. Ýeri gelende aýtsak, Halkara ýeňil atletika federasiýasy açyk meýdançadaky hem-de ýapyk desgadaky rekordlary birleşdiripdi.
