PDF
Woleýbol boýunça zenanlaryň arasynda geçirilen Ýewropa çempionatynda Türkiýäniň ýygyndysy çempion boldy. Final tapgyry Stambulda geçirilen ýaryşa 24 ýygyndy gatnaşdy. Finalda Türkiýe bilen häzirki wagtda sanawyň birinjisi Italiýanyň ýygyndylary duşuşdy. Duşuşygyň 1-nji setinde italýanlar 25:16 hasabynda üstün çykdy. 2-nji setde türkler 25:22 hasap bilen ýeňiş gazandy. 3-nji setde italýanlara ýeňiş gazanmak ýeňil düşdi (25:12). Çekeleşikli geçen 4-nji setde Türkiýäniň ýygyndysy 25:21 üstün çykyp, umumy hasaby deňledi. Ýeňijini taý-brek kesgitläp, 5-nji setde 15:10 hasabynda ýeňiş gazanan Türkiýäniň ýygyndysy bassyr 2-nji gezek yklymyň çempiony bolmagy başardy. Türkiýäniň ýygyndysy 2023-nji ýylda-da finalda Serbiýany ýeňip, ilkinji çempionlygyny gazanypdy.
Türkiýäniň ýygyndysy Ýewropa çempionatynda 2 gezek çempionlyk gazanan 6-njy topar boldy. Bu olaryň 7-nji medaly bolup, Türkiýäniň ýygyndysy 2003-nji we 2019-njy ýyllarda 2-nji, 2017-nji hem-de 2021-nji ýyllarda 3-nji orny eýeläpdi. Türkiýäniň ýygyndysy soňky 6 ýaryşda-da ýarym finala çykmagy başardy.
Baýrakly 3-nji ýer ugrundaky oýunda Serbiýanyň ýygyndysy Polşanyň ýygyndysyny 3:1 hasabynda ýeňip, bürünç medala mynasyp boldy.
Çempionatyň iň ökde oýunçysy diýlip, türkiýäniň çempionlygyn uly goşant goşan Melissa Wargas saýlandy. Ol geçen çempionatda-da bu baýraga mynasyp bolupdy. Ol çempionatda 195 utuk bilen çykyş edip, şwesiýaly Isabelle Haakdan soň (247) 2-nji orny eýeledi.
34-nji gezek guralan Ýewropa çempionatynyň toparçalaýyn tapgyry Türkiýäniň Stambul, Azerbaýjanyň Baku, Şwesiýanyň Gýotenburg hem-de Çehiýanyň Brno şäherlerinde, utulan-çykdy oýunlary bolsa Stambulda geçirildi. Ýewropa çempionatynda Russiýanyň ýygyndysy 19 çempionlyk (14-si ozalky SSSR-e degişli) bilen ep-esli öňde barýar. Italiýa (2007, 2009, 2021) Serbiýa (2011, 2015, 2017) 3, Polşadyr (2003, 2005) ozalky Gündogar Germaniýa (1983, 1987) hem-de Türkiýe (2023, 2026) 2, Çehiýa (1955), Niderlandlar (1995), Bolgariýa (1981) 1 gezek çempionlyk gazandy.
Täze düzgüne laýyklykda, Ýewropa çempionaty şu ýyldan başlap, mundan soň jübüt ýyllarda her 2 ýyldan bir gezek geçiriler. Täk ýyllarda bolsa her 2 ýyldan Dünýä çempionaty guralar. Indiki Ýewropa çempionaty 2028-nji ýylda Ispaniýadyr Slowakiýada geçiriler.
