Özbegistanyň «Silk Road Samarkand» halkara sergi merkezinde Halkara küşt federasiýasynyň (FIDE) howandarlygynda geçirilýän 46-njy Bütindünýä küşt Olimpiadasynyň birinji tapgyry geçirildi. Türkmenistanyň iki ýygyndy topary — erkekler hem-de zenanlar ýygyndysy ýaryşa iň ýokary 4:0 hasabyndaky ýeňişler bilen başladylar.

Erkekler ýygyndysy — Timor–Leste ýygyndysy bilen 4:0

Başlangyç tapgyrda Türkmenistanyň topary (65-nji reýting belgili, ortaça reýtingi 2383) Timor-Leste ýygyndysy (168-nji reýting belgili) bilen garşylaşd we dört döwüň hemmesinde ýeňiş gazandy:

  • 1-nji tagta: grossmeýster Saparmurat Atabaýew (reýtingi 2503) — Elder de Araužu (1905) — 1:0
  • 2-nji tagta: FIDE ussady Amanmuhammet Hommadow (2389) — Andrade Pintu (1820) — 1:0
  • 3-nji tagta: Şahruh Turaýew (2222) — Paulu Fernandeş de Karwalýu (1810) — 1:0
  • 4-nji tagta: Wepaly Halnyýazow (2257) — Mariu Melu Nasimentu (1788) — 1:0

Grossmeýster Meýlis Annaberdiýew (2384) birinji tapgyrda dynç aldy we toparyň ätiýaçlygynda galýar. Erkekler ýygyndysynyň kapitany — Türkmenistanyň at gazanan tälimçisi Serdar Annaberdiýew.

Zenanlar ýygyndysy — Lihtenşteýn ýygyndysy bilen 4:0

Türkmenistanyň zenanlar topary (55-nji reýting belgili, ortaça reýtingi 2057) hem edil şol 4:0 hasaby bilen Lihtenşteýn ýygyndysyny (151-nji reýting belgili) ýeňdi:

  • 1-nji tagta: zenanlaryň arasynda FIDE ussatlygyna dalaşgär Leýla Şöhradowa (2101) — Timea Zele (1790) — 1:0
  • 2-nji tagta: zenanlaryň arasynda FIDE ussady Jahan Rejepowa (2027) — Sofi Mannhart (1533) — 1:0
  • 3-nji tagta: Mähri Agamuradowa (1939) — Telma Martines Hengewoss (1499) — 1:0
  • 4-nji tagta: Ogulsuraý Baýrambaýewa (1952) — Doris Heron (reýtingisiz) — 1:0

Toparyň lideri, zenanlaryň arasynda FIDE ussady Lala Şöhradowa (2147) birinji tapgyrda oýnamady.

Taryhda ilkinji gezek Olimpiada Merkezi Aziýada geçirilýär. Ýaryş gatnaşyjylaryň sany boýunça rekord derejededir: “chess-results.com” saýtynyň maglumatlaryna görä, açyk ýaryşda 206 topar, zenanlaryň arasyndaky ýaryşda bolsa 190 topar bäsleşip başlady (öňki rekord — Budapeşt-2024-de 380 topar); jemi iki müňe golaý küştçi gatnaşýar.

Gyzykly bolup bilerЕЩЕ ОТ АВТОРА