UEFA Çempionlar ligasynda toparçalardaky oýunlar tamamlanyp, 1/8 finala çykan klublar belli boldy. 14 ýurtdan wekilçilik eden 32 klubuň 16-sy ýaryşy dowam eder. Şol 16 topar bolsa, 6 ýurda wekilçilik edýär. 4 klub bilen wekilçilik edýän 4 döwletiň 2-siniň bir topary ýaryşy dowam etdirip bilmez. Ýagny Germaniýadyr Ispaniýanyň 4, Italiýa bilenem Angliýanyň 3 kluby kubok ugrundaky göreşi dowam etdirerler. Beýleki 2 topar bolsa, Fransiýa bilen Portugaliýanyň toparydyr. Klublaryň arasyndaky iň uly ýaryşda Germaniýanyň “Bawariýa”, “Borussiýa D”, “Borussiýa M”, “Leipsig”, Ispaniýanyň “Real Madrid”, “Barselona”, “Sewilýa”, “Atletiko Madrid”, Italiýanyň “Ýuwentus”, “Lasio”, “Atalanta”, Angliýanyň “Liwerpul”, “Mançester Siti”, “Çelsi”, Fransiýanyň PSŽ hem-de Portugaliýanyň “Porto” toparlary 1/8 finalda çykyş ederler.
1/8 finalyň bije çekiliş dabarasy 14-nji dekabrda geçiriler. Bijä laýyklykda toparçalarda duşuşan klublar hem-de bir ýurduň wekilleri özara gabatlaşmaz. 1/8 finalyň 1-nji oýunlary geljek ýylyň 16-17-nji, 23-24-nji fewralda oýnalar. Jogap duşuşyklary bolsa, 9-10-njy hem-de 16-17-nji martda geçiriler. Mälim bolşy ýaly, final duşuşygy 2021-nji ýylyň 29-njy maýynda Stambuldaky Atatürk stadionynda oýnalar.
