Hytaýyň kosmosa uçuran “Tianzhou-2” atly ýük gämisiniň orbita ýerleşendigi habar berildi. Ýurduň milli kosmos edarasy “The Tianzhou-2”-niň Haýnan welaýatyndaky kosmodromdan uçurylandygyny we 8 sagatdan soňra bökdençsiz ýagdaýda degişli orbita çykarylandygyny mälim etdi. Şeýlelikde ýangyç we beýleki materiallary äkiden gämi “Tiangong” atly modula birikdi. Hytaý kosmos stansiýasynyň gurluşygyny amala aşyrýar. Golaýda jemi üç bölekden ybarat boljak kosmos bekediniň esasy bölegi orbita ýerleşdirilipdi. Ýük gämisi hem şol stansiýanyň gurluşygy üçin gerek bolan meteriallary äkitdi. Bu taslamanyň durmuşa geçirmek üçin 2022-nji ýylyň ahyryna çenli ýene 11 uçuş amala aşyrylar. Netijede Hytaý Halk Respublikasynyň “Tiangong” atly özbaşdak kosmos bekedi gurlar. Uçurylan kosmos gämisiniň umumy agramynyň 13,5 tonnadygy we ýük göterijiliginiň 6,8 tonnadygy mälim edildi.
Häzirki wagtda Ýeriň orbitasynda adamly ýeke-täk beket bar. ABŞ, Russiýa, Kanada, Ýaponiýa we Ýewropa ýurtlarynyň gatnaşmagynda ýöredilýän bu beketde Hytaý bilen hyzmatdaşlyk edilmeýär. Kosmos pudagynda ösüş gazanmak isleýän Hytaý özbaşdak beket döredýär.
