Şu wagta çenli oýnalan duşuşyklaryň arasynda iň köp golly hem-de iň gyzykly geçeni Niderlandlar bilen Ukrainanyň arasyndaky oýun boldy. Amsterdamdaky Johan Cruyff Arenada oýnalan oýnuň birinji ýarymynda çekeleşikli geçse-de hasap açylmady. Aýratynam ukrainleriň derwezeçisi Georgiý Buşan erjel oýun görkezdi. 2-nji ýaryma ýer eýeleri, ýagny pyrtykal reňkliler gol bilen başlady. Oýnuň 52-nji minutynda Jorjinio Weýnaldum hasaby açdy. Bu goldan 7 minut soň Waut Werghorst hasaby 2-0-a çykardy. Ukrainler bu gollara oýnuň tamamlanmagyna 15 minut galanda 4 minutda geçiren owadan gollary bilen jogap berdiler. Duşuşygyň 75-nji minutynda Andreý Ýarmolenka ajaýyp gol geçirip, toparyny umytlandyrdy. Bu onuň milli topardaky 41-nji goly boldy. Şeýle-de bu ukrainleriň Ýewropa çempionatlaryndaky 3-nji goly bolup, Ýarmolenkodan öň toparyň häzirki tälimçisi Andreý Şewçenko 2012-nji ýylda 2 gezek tapawutlanypdy. Bu goldan 4 minutdan soň, Milewskiniň pasyny kelle urgusy bilen derwezä gönükdiren Roman Ýaremçuk hasaby deňledi. Ýöne ruhdan düşmedik niderlandlar yzly-yzyna hüjüm baryny amala aşyrdylar. Oýnuň 85-nji minutynda goýberilen ýalňyşlyklardan soň Denzel Dumfris pyrtykal reňklileri öňe saýlady. Bu duşuşykda soňky gol boldy we Niderlandlaryň ýygyndysy toparçadaky güýçli garşydaşyndan 3-2 hasabynda üstün çykdy. Niderlandlaryň ýygyndysy 2008-nji ýyldan soň Ýewropa çempionatyndaky ilkinji ýeňşini gazandy.
