Ýewropa çempionaty portugaliýaly super ýyldyz Kristiano Ronaldo üçin täze rekordlaryň çempionaty bolup biler. 36 ýaşyndaky ýyldyz futbolçy çempionatyň çäginde ýene bir gezek tapawutlansa, onda ol Ýewropa çempionatlarynyň iň netijeli oýunçysy bolar. Ol häzirki wagtda bu rekordy Mişel Platini bilen paýlaşyp, 2 oýunçynyň-da 9 goly bar. Ronaldo 2004-nji ýylda 2, 2008-nji ýylda 1, 2012-nji we 2016-njy ýyllaryň hersinde-de 3 gol geçirdi. Şeýle-de ol bu bäsleşikde tapawutlanan ýagdaýynda ol 5 çempionatda gol geçiren ilkinji oýunçy bolar.
Häzirki wagtda Ýewropa çempionatlarynyň çäginde 21 duşuşyk geçiren Ronaldo bu ugurda rekordyň eýesidir. Ol bu babatda Bastian Şwanştaýger (18) bilen Janluiji Buffon (17) öňde barýar.
Ronaldo Ýewropa çempionatlarynda iň köp duşuşykda ýeňiş gazanan 3 oýunçynyň biridir. Ronaldo bu ugurda Andres Iniesta, Sesk Fabregas dagy bilen rekordy paýlaşyp, 3 oýunçy-da 11 duşuşykda ýeňiş gazandy.
Eger-de Ronaldo çempionatyň dowamynda 6 gol geçirse, onda ol milli ýygyndyda ähli döwürleriň iň köp gol geçiren oýunçysy bolar. Häzirki wagtda 104 goly bolan Ronaldo bu ugurda eýranly 109 golly Ali Daeiden soň 2-nji ýerde barýar.
