Ýewropa çempionatynda Italiýanyň ýygyndysynyň şemaly belentden öwüsýär. 3 oýunda-da ýeňiş gazanyp, 7 gol geçiren Italiýanyň ýygyndysy soňky 11 oýunda derwezesinden gol geçirtmedi. 11 oýnuň ählisinde-de ýeňiş gazanyp, bu ugurda öz rekordyny ösdürýän Azzurriler şol duşuşyklarda garşydaşlarynyň derwezesinden jemi 32 gol geçirdiler. Başgaça aýdylanda, Italiýanyň ýygyndysy 1000 minutlap derwezesini goldan goramagy başardy. Italýanlar soňky gezek 2020-nji ýylyň oktýabrynda Niderlandlar bilen bolan oýunda derwezelerinden gol geçirdipdiler. Şonda Wan de Beek Italiýanyň derwezesinden gol geçiren soňky oýunçy bolupdy.
Şeýle-de, derwezeçi Janluiji Donnarumma hem 17 ýaşyndan bäri Italiýanyň ýygyndysynyň derwezesini gorap gelýär. Soňky wagtlarda ýygyndynyň esasy derwezeçisine öwrülen ýaş ýyldyz Donnarumma 29 gezek Gökleriň köýnekçesini geýdi. Italiýanyň ýygyndysy Donnarummanyň derwezede duran duşuşyklarynyň hiç birinde-de 1-den köp gol geçirtmedi.
Italiýanyň ýygyndysy 1/8 finalda “C” toparçada 2-nji orny eýelejek ýygyndy bilen, has takygy, Ukrainanyň ýa-da Awstriýanyň ýygyndysy bilen çärýek finala çykmak ugrunda güýç synanyşar.
Umumylykda bassyr 13 oýundan bäri ýeňiş gazanyp gelýän italýanlar ýene-de 2 duşuşykda ýeňiş gazansalar onda, Ýewropa çempionatynyň rekordyny (saýlama tapgyry, final tapgyry) täzelärler.
