Ýewropa çempionatynda tapgyryň iň esasy oýunlarynyň birinde Angliýa bilen Germaniýa duşuşdy. Wembley-de oýnalan oýnuň 1-nji ýarymy golsuz tamamlandy. 2-nji ýaryma nemesler hüjümler bilen başlasa-da soňlugy bilen hasaby açan iňlisler boldy. Duşuşygyň 75-nji minutynda Rahim Sterling hem-de 86-njy minutda Harri Keýn tapawutlandy. 2-0 hasabynda ýeňşini baýram eden Angliýanyň ýygyndysy çärýek finala çykdy. 4 oýunda 4 gol geçirip, ýeke gol hem geçirtmedik iňlisler çärýek finalda Ukraina bilen duşuşar. Angliýanyň ýygyndysy 14-nji gezek Germaniýany ýeňip, olar Wembley-de uly ýaryşlarda henize çenli utulanok. Şeýle-de, Angliýanyň ýygyndysy Sterlingiň gol geçiren 13 duşuşygynda ýeke sapar hem utulmady. Sterling toparynyň Horwatiýany hem-de Çehiýany 1-0 hasaplar bilen ýeňen duşuşyklarynda-da iňlislere ýeňiş getiren gollary öz adyna ýazdyrypdy. Ol 65 oýunda 17 gol geçirdi.
Şeýle-de Angliýanyň ýygyndysy Ýewropa çempionatlarynda 1968-nji ýyldan bäri utulan-çykdy tapgyrynda penalti urgularysyz ilkinji gezek ýeňiş gazanan nobatdaky tapgyra çykdy.
Germaniýanyň ýygyndysyna Ýewropa çempionatynda 2004-nji ýyldan soň ilkinji gezek çärýek finala çykmak başartmady.
