Ýer ýüzünde koronawirusa garşy sanjym gyzgalaňly ýagdaýda dowam etdirilýär. Dünýä ýurtlarynda häzire çenli 3 milliard 262 million dozadan gowrak sanjym edilendigi mälim edildi. Bu ugurda öňdebaryjy hasaplanýan Hytaýda 1 milliard 318 million doza sanjym uruldy. Ýewropa Bileleşigine agza ýurtlarda 388 million doza, Hindistanda 360 million doza sanjym edildi.
Dünýäde jemi 86 sanjym işlenip taýýarlanýar. Häzire çenli jemi 12 sanjym tassyklanyp, ulanylmagyna rugsat edildi. “Bloomberg” neşiri tarapyndan taýýarlanan maglumatda millionlarça doza sanjymy üpjün etmegiň we paýlamagyň häzire çenli ýerine ýetirilen iň kyn logistika işidigine üns çekilýär.
Dünýä derejesinde her günde 36,3 million doza sanjym edilýändigi habar berildi. Täze sanjymlaryň taýýar bolmagy bilen depginiň görnetin artmagyna garaşylýar.
