“SpaceX” kompaniýasynyň kosmos gämisi arkaly Halkara kosmos bekedine ýük we ýangyç iberildi. Ugradylan ýükleriň arasynda awokado, limon, doňdurma ýaly azyk harytlary bar. Şeýle hem ýükleriň arasynda ylmy barlaglary geçirmek maksady bilen garynja we krewetka (deňiz leňňeçleriniň bir görnüşi) hem iberildi. Iki tonnadan gowrak ýükleriň arasynda “Gitai Inc.” ýapon firmasynyň öndüren robot-goly bar. “SpaceX” kompaniýasynyň “Dragon” ýük gämisi “Falcon” göteriji raketasy bilen Florida ştatyndaky Kennedi kosmodromyndan uçuryldy.
Soňky ýyllarda NASA halkara kosmos bekedine ýük we astronawt gatnawyny amala aşyrmak üçin hususy kompaniýalar bilen hyzmatdaşlygy ýola goýdy. Bu hyzmatdaşlygyň çäklerinde “SpaceX” kosmos bekedine 23-nji gatnawyny amala aşyrdy.
