HABAR / SELJERME
Portugaliýaly futbolçy Kristiano Ronaldo iki gün öň milli ýygyndylaryň iň köp gol geçiren futbolçysy diýlen ugurda rekordyň täze eýesi boldy. Oňa şol mynasybetli Ginnesiň Rekordlar kitabynyň ýörite diplomy hem gowşuryldy.
Ronaldo Irlandiýa bilen bolan duşuşykda Ýewropada iň köp milli ýygyndyda oýnan iki oýunçynyň biri bolup, dünýäde-de iň köp gol geçiren futbolçy boldy. Ol 180 oýunda 111 gezek tapawutlanyp, eýranly Ali Daeiniň rekordyny täzeledi. Eýsem Ronaldo şol 111 goly haýsy ýygyndylaryň derwezesinden geçirdi? Ronaldony halamaýanlaryň diýşi ýaly, köpüsini penaltiden ýoldaşlyk duşuşyklarynda pesräk ýygyndylaryň derwezesinden geçiripdirmi ýa güýçli ýygyndylar hem barmy? Geliň şoňa bilelikde seredeliň.
45 ÝYGYNDYNYŇ DERWEZESINDEN GOL GEÇIRDI
Ronaldo geçiren 111 golyny 45 ýygyndynyň derwezesinden girizipdir. Ol Dünýä Kubogynyň saýlama tapgyrynda 33 (41 oýunda), Ýewropa çempionatynyň saýlama tapgyrynda 31 (35 oýunda), ýoldaşlyk duşuşyklarynda 19 (51 oýunda), Ýewropa çempionatynda 14 (25 oýunda), Dünýä Kubogynda 7 (14 oýunda), Milletler Ligasynda 5 (6 oýunda), Konfederasiýa Kubogynda 2 (4 oýunda) gezek tapawutlandy. Bu görkezijileriň käbiri rekorda deňdir. Ronaldo Ýewropa yklymynyň 34, Afrika yklymyndan 4, Aziýa yklymyndan 3, Günorta Amerika yklymyndan 2, Demirgazyk Amerika we Okeaniýa yklymynlaryndanam 1 ýygyndynyň derwezesinden gol geçirdi.
Onuň iň köp gol geçiren ýygyndylary Şwesiýa bilen Litwa bolup, super ýyldyz iki ýygyndynyň hem derwezesinden 7 gol girizdi. Ol Lýuksemburg, Wengriýadyr Andorranyň ýygyndylaryndan 6 gol geçirdi. Ermenistanyň, Latwiýanyň ýygyndylaryndan 5, Estoniýadyr Farer adalarynyň hem-de Niderlandlaryň ýygyndylarynyň derwezesinden 4, Daniýanyň, Demirgazyk Irlandiýanyň, Russiýanyň, Ispaniýanyň, Belgiýanyň, Şweýsariýanyň ýygyndylaryndan 3, Kipriň, 
Azerbaýjanyň, Gazagystanyň, Irlandiýanyň, Fransiýanyň, Bosniýa we Gersegowinanyň, Çehiýanyň, Kamerunyň, Müsüriň, Saud Arabystanynyň ýygyndylaryndan 2, Polşanyň, Ukrainanyň, Horwatiýanyň, Eýranyň, Ysraýylyň, Argentinanyň, Germaniýanyň, Ekwadoryň, Gananyň, Finlýandiýanyň, Islandiýanyň, Demirgazyk Koreýanyň, Gresiýanyň, Täze Zelandiýanyň, Marokkonyň, Panamanyň, Serbiýanyň, Slowakiýanyň hem-de Uelsiň ýygyndylaryndan 1 gol geçirmegi başardy. Ronaldonyň häzirlikçe Angliýa, Italiýa, Braziliýa ýaly dünýäniň öňdebaryjy ýygyndylaryndan hasaplanýan käbir toparlaryň derwezelerine goly ýok.
PENALTIDEN GEÇIREN GOLLARYNYŇ SANY 14
Ol gollarynyň 14-sini penaltiden, 10-syny jerime urgularyndan, galan 87-sini adaty oýun mahalynda derwezä girizdi. Ol 27 goly kelle, 25 goly çep aýagy, 59 goly sag aýagy bilen derwezä saldy.
Gollarynyň minutlaryna seredenimizde, 1-10-njy minutda 10 (3-si penalti), 11-20-nji minutlarda 3, 21-30-njy minutlarda 14 (3), 31-40-njy minutlarda 10 (3), 41-45+-njy minutlarda 7, 46-55-nji minutlarda 9, 59-65-nji minutlarda 15 (1), 66-75-nji minutlarda 8 (1), 76-85-nji minutlarda 19 (2), 86-90+-njy minutlarda 16 (1) gol geçirdi.
Ronaldonyň geçiren gollarynyň 13 göterimi Portugaliýanyň ýygyndysyna ýeňiş gazandyran bolsa, 43 göterimi ýygyndyny öňe saýlady. Ronaldonyň gol geçiren oýunlarynyň 82 göteriminde Portugaliýa ýeňiş gazanmagy başardy (163 duşuşykda), 10 göterim, ýagny 7 duşuşykda ýeňlişe sezewar boldy. 10 oýunda-da deňme-deňlik hasaba alyndy.
9 HET-TRIK
Ronaldo 2-si 4 jemi 9 gezek het-trik etdi. Ol şol 111 goly meýdança çykan 180 duşuşygynyň 73-sinde geçirdi. Onuň iň köp gol geçiren ýyly 2019-njy ýyl bolup, ol şol ýyl 14 gezek tapawutlandy. Ronaldo milli ýygyndydaky ilkinji 100 duşuşygynda 37 gol geçirip, galan 74 goly soňky 80 duşuşykda öz adyna ýazdyrdy.
Gazetiň sport synçysy.
