Durky täzelenen ýollaryň – N.Andalyp we Magtymguly şaýollarynyň täze bölekleriniň aýlawly çatryklarynda bina edilen bu gabaraly heýkel kompozisiýalary Bitaraplyk gününiň öň ýanynda aşgabatlylar üçin baýramçylyk sowgadyna öwrüldi. N.Andalyp bilen “10 ýyl abadançylyk” şaýollarynyň kesişýän ýerinde döredilen aýlawda “Zemin” diýlip atlandyrylan binagärlik-bezeg minarasy peýda boldy.
Töwerege ýalkym saçýan demir toruň üstünde ýerleşdirilen şar biziň Ýer togalagymyzy alamatlandyrýar.
Nobatdaky heýkel “Jebislik” diýlip atlandyrylýar. Ol N.Andalyp we A.Nyýazow şaýollarynyň kesişýän aýlawynda ýerleşdirildi. Bu desganyň çeper taglymatynda ençeme çeşmeleriň bir bitewi joşgunly akaba öwrülip, öz ugrunda ähli päsgelçiliklerden geçip bilýändigi baradaky pikiriň döredijilikli açylýandygyny aňladýar. Emma şu kompozisiýada alaw esasy keşp bolup, azatlygyň, nuruň, ýagtylygyň, durmuşyň, ruhuň we paýhasyň nyşany, şeýle hem däp-dessurlaryň yzygiderliliginiň alamaty bolup durýar.
N.Andalyp we Galkynyş şaýollarynyň kesişýän aýlawynda bolsa “Ösüş” diýlip atlandyrylan özboluşly plastiki kompozisiýa bina edildi. Monumentallygyna garamazdan, onuň gözüňi dokundyrýan nusgawy gurluşy ösüşi, galkynyşy we täzelenilişi, şol bir wagtda durmuşyň kuwwatyny beýan edýär.
N.Andalyp we Magtymguly şaýollarynyň kesişýän ýerinde çatrygyň keşbini garlawaçlary şekillendirýän belent heýkel janlandyrýar. Ol “Erkanalyk” diýlip atlandyryldy we ruhuň, pikiriň erkinligini, ylham-joşgunyň asyllylygyny alamatlandyrýar. Asmana galýan guşlaryň sudurynda adamyň keşbi göze ilip, ony alys gözýetimler özüne imrindirip, boýun egmedik belentlikler çagyrýar. Galyberse-de, garlawaç halk arasynda baharyň, ýagşylygyň, bagtyýarlygyň, umyt-arzuwyň, şowlulygyň buşlukçysy hasaplanypdyr.
Ýene bir monument Magtymguly we Aba Annaýew şaýollarynyň çatrygyndaky aýlawda ýerleşdirilip, “Çemen” diýlip atlandyrylýar. Onuň şekiliniň ýönekeýligi we täsirliligi köp manylylygy özünde jemleýär. Çünki çemen – bu toý-dabaranyň nyşany bolmak bilen, onuň bilen iň gowy arzuwlary – bagtyýarlygy, söýgini, bereket-bolçulygy, saglygy, üstünlikleri baglanyşdyrýarlar.
