Eserler ýazylanda edebi tahallus ulanmak köp ýyllardan bäri dünýäniň köp milletlerine meşhurdyr. Golaýda Ispaniýanyň “Planeta” atly baýraklary (“Premio Planeta de Novela”) gowşuryldy. 1952-nji ýyldan bäri gowşurylyp gelinýän edebiýat baýraklarynyň gowşurylyş dabarasynda täsin waka bolup geçdi. Alypbaryjy birnäçe ýyllap dürli eserleri ýazan, käbir eserlerine esaslanyp filmler surata düşürilen Karmen Molanyň (ispanlarda zenan ady) baýraga mynasyp bolandygyny yglan edip, ony sahna çagyrdy. Sahna zenan maşgalanyň deregine üç sany erkek adam çykdy. Olar Karmen Mola tahallusy bilen ýazylan eserleriň awtorydygyny aýdylar. Bu ýagdaý Molanyň okyjylaryny, emin agzalaryny we edebiýat tankytçylaryny haýran galdyrdy.
Dürli başdangeçirme eserlerini ýazýan Karmen Molanyň muşdagy az däl. Emma onuň kimdigi häzire çenli belli bolmandy. Netijede umumy mukdary 1 million ýewro bolan baýrak Agustin Martinez, Horge Diaz we Antonio Mersero daga berildi.
Häzire çenli Molanyň kimdigi barada dürli çaklamalar orta atylypdy. Onuň 40 ýaşlaryndaky professordygy aýdylypdy. Molanyň kitaplarynyň 200 müňden gowragy satyldy. Jemi on bir dile terjime edildi. Şeýle hem “Endemol Shine” we “ViacomCBS International Studios” tarapyndan telefilmi çykaryldy.
Ýeri gelende bellesek, “Premio Planeta de Novela” dünýäniň iň köp pul berýän edebiýat baýragy hasaplanýar.
