Geçen hepdäniň ahyrynda Aston Willa üç ýyllyk tälimçisi Din Smiti wezipesinden boşadypdy. 2-3 günden bäri-de onuň ornuna bir döwürleriň meşhur futbolçysy Stiwen Jerardyň wezipä bellenjekdigi barada gürrüňler edilýärdi. Az salym öň bolsa, bu gürrüňleriň takyklygy resmi ýagdaýda tassyklandy. Şeýlelikde, Stiwen Jerard Şotlandiýanyň Reýnjers toparyndaky wezipesini taşlap, Aston Willanyň tälimçiligine bellendi. 41 ýaşyndaky hünärmen birmingemliler bilen 2,5 ýyllyk şertnama baglaşar.
Karýerasynyň agramly bölegini Liwerpulda geçiren Jerard 2018-nji ýyldan bäri Reýnjers toparyna tälim berip gelýärdi. Reýnjers onuň tälimçiliginde geçen möwsümde çempionlyk gazanypdy.
Aston Willa 11 tapgyrdan soň 10 utuk bilen 16-njy orunda barýar.
Şeýle-de Premier Ligada Norwiç Sitiniň hem tälimçilige Frank Lampardy wezipä bellemegine garaşylýar.
