Britan kompaniýasy “Bellwether Industries” tarapyndan döredilen iki orunlyk “Volar” awtoulagynyň prototipiniň ilkinji synaglary Dubaýda geçirildi. Synag uçuşlary şowly boldy. Uzakdan dolandyrylýan prototip, dört metr belentlikde sagatda 40 km tizlikde birnäçe uçuşy amala aşyrdy. Tigirsiz uçýan awtoulag, fantastiki filmlerdäki futuristik awtoulaglara meňzeýär.
Geljekde kompaniýa bazara dört orunlyk uçýan awtoulag çykarmagy meýilleşdirýär. Ol sagatda 217 km tizlik bilen uçar we uçuş beýikligi 900 metre ýeter. Bir batareýa zarýadynda uçuş wagtynyň 90 minuda çenli bolmagyna garaşylýar. Uçar 2028-nji ýyla çenli satuwa çykarylar we hususy awtoulag ýa-da taksi hökmünde ulanylyp bilner.
2021-nji ýylyň noýabr aýynda BAE hökümeti ýurduň awtoulag ýollarynda öz-özüni dolandyrýan awtoulaglary synagdan geçirmäge mümkinçilik berýän wagtlaýyn ygtyýarnamalaryň beriljekdigini habar berdi. BAE Ýakyn Gündogarda ilkinji we dünýäde awtonom ulaglary synagdan geçiren ikinji ýurt boldy.
BAE-nyň meýilnamalaryna görä, 2030-njy ýyla çenli ähli ulaglaryň 25 göterimi awtonom görnüşde işlär. Bu aralykda, eýýäm, 2023-nji ýylda Dubaýdaky her 20 taksi ulagy sürüjisiz halda ýolagçylary gatnadar. 2020-nji ýylda Şarjada ekologiýa taýdan arassa sürüjisiz awtoulaglary hem synagdan geçirdi. Abu-Dabi hökümeti taksileri sürüjisiz görnüşe geçirmek baradaky meýilnamalary hem goldady.
Sürüjisiz ulag ulgamynyň kömegi bilen Dubaýda transport çykdajylary ýylda 900 million dirhem (246 million dollar), daşky gurşawyň hapalanmagynyň derejesi bolsa 12% azalar. Ulag pudagynyň netijeliligini ýokarlandyrmak bilen, Dubaý 2030-njy ýyla çenli goşmaça 18 milliard dirhem (4,9 milliard dollar) gazanmaga bil baglaýar.
