Niderlandlaryň sport we saglygy goraýyş ministri Ernst Kuýpers ýurtda dowam edýän “Covid-19” çäklendirmeleriniň 25-nji fewraldan başlap doly aradan aýryljakdygyny mälim etdi. Ýüz örtügi we howpsuz araçäk düzgünleri diňe jemgyýetçilik ulaglarynda we aeroportlarda talap ediler. Ministr erbet günleriň yzda galandygyny belledi. Kuýpers koronawirus ýokanjynyň hemmä geçendigine garamazdan, hassalaryň sanynyň azalandygyna ünsi çekip, täze ştammlaryň o diýen gorkuly däldigini aýtdy. Ol “Covid-19” bolanlaryň sanynyň köpdügini, muňa garamazdan, ilatyň köp böleginiň sanjym alyp, immunitetini güýçlendirmeginiň koronawirus çäklendirmeleriniň gutarmagyna getirendigini belledi. Ministr çäklendirmeleriň tapgyrlaýyn aradan aýrylýandygyny, öýlere myhman kabul etmekdäki çäklendirmeleriň hem dolulygyna aradan aýryljakdygyny, gije klublarynyň sagat 01:00-a çenli açyk boljakdygyny belledi.
Mundan soňra karantina möhletiniň 5 gün boljakdygyny aýdan Kuýpers öýden işlemegiň hem gutarandygyny habar berdi. Restoran, teatr we kinoteatrlar 500 we ondan köp adamy kabul edip biler.
