UEFA-nyň täze bäsleşigi bolan Ýewropa Konferensiýa Ligasynda pleý-off tapgyryň 2-nji duşuşyklary oýnaldy. Şolaryň birinde Azerbaýjanyň Garabag topary öz meýdançasynda Fransiýanyň Marsel toparyny kabul etdi. Çekeleşikli geçen oýunda Marsel 1-0 öňde mahaly duşuşygyň 34-nji minutynda Garabag toparynyň senegally hüjümçisi Ibrahima Wadji topy eli bilen derwezä girizdi. Bu goldan soň marselli futbolçylar emine oýunçynyň topy eli bilen salandygyny aýtdylar. Garabag toparynyň tälimçisi, meşhur hünärmen Gurban Gurbanow hem öz oýunçysyndan topy elläp-ellemändigini sorady. Wadji bolsa topa eliniň degendigini boýun aldy. Tälimçi Gurbanow bolsa emine Wadjiniň topa eliniň degendigini, şol sebäpli goluň hasaba alynmaly däldigini habar berdi. Şondan soň emin goly hasaba almady. Netijede, 1-nji duşuşykda 3-1 ýeňiş gazanan Marsel jogap oýnunda 3-0 hasabynda ýeňşini baýram edip, 1/8 finala adyny ýazdyrdy. Marsele ýeňiş getiren gollary Geýe (12), Gendezi (77) hem-de De la Fuente (90+2) geçirdi.
