Türkiýäniň çempionaty Süper Ligde iň aşaky orunda barýan Ýeni Malatýaspor topary 17 tapgyrdan soň ýeňiş gazandy. Klub öz meýdançasynda 28-nji tapgyryň çäklerinde Adana Demirspor toparyny Muniriň 77-nji minutdaky ýeke-täk goly bilen 1-0 hasabynda ýeňlişe sezewar etdi. Şeýlelikde, Ýeni Malatýaspor topary 17 duşuşykdan soň ilkinji ýeňşini gazandy. Bu olaryň 5-nji ýeňşi bolup, olar häzirki wagtda 20 utuk bilen iň soňky orunda barýar. Adana Demirspor bolsa 5 oýundan soň ýeňlişe sezewar boldy. Ýeni Malatýaspor çempionatda soňky gezek geçen ýylyň 22-nji oktýabrynda ýeňiş gazanypdy. Şeýle-de olar Adana Demirspor toparyndan myhmançylykda-da 2-0 üstün çykypdylar.
Türkiýäniň çempionatynda 28-nji tapgyryň merkezi oýnunda ertir Fenerbahçe öz meýdançasynda lider Trabzonspory kabul eder.
