UEFA Çempionlar Ligasynda çärýek finalçylaryň ýene-de ikisi şu gijeki duşuşyklardan soň belli bolar. Gijäniň iň esasy oýny gürrüňsiz Madriddäki “Real” bilen PSŽ-niň arasyndaky duşuşyk bolup, ol 01:00-da başlar. Duşuşyga Niderlandlardan Danni Makkeli eminlik eder. Duşuşykda Kilian Mbappeniň çykyş edip-etmejekdigi belli däl.
1-nji oýunda PSŽ 90+4-nji minutda Kilian Mbappeniň goly bilen 1-0 hasabynda ýeňiş gazanypdy. Iki topar şu gijeki duşuşyga çenli 11 gezek gabatlaşdylar. Her topar 4 gezek ýeňiş gazandy. 3 oýun deňlikde tamamlanyp, gollarda parižliler 15-13 öňde.
Beýleki duşuşykda Portugaliýadan uly hasaply ýeňiş (5-0) dolanan “Mançester Siti” öz meýdançasynda “Sportingi” kabul eder. “Mançester Siti” üçin formal duşuşyk boljak oýunda türkiýeli Halil Umut Meler jürlewük çalar.
