UEFA Çempionlar Ligasynda PSŽ topary ýene bir ýola ispan klublaryndan asgyn geldi. 2016/17 möwsüminde öz meýdançasynda “Barselonany” 4-0 ýeňip, myhmançylykda-da 6-1 utulyp, taryhy duşuşyklary başdan geçiren klub bu gezek şeýleräk sarsgyny “Real Madridden” gördi. Öz meýdançasynda Kilian Mbappeniň 90+4-nji minutdaky goly bilen 1-0 ýeňiş gazanan PSŽ, Madriddäki oýunda-da ýene şol ýyldyzynyň 39-njy minutdaky goly esasynda öňe saýlandy. Ýöne ruhdan düşmedik “Real Madrid” topary 2-nji ýarymda Karim Benzemanyň 17 minutda eden het-trigi bilen çärýek finala çykan klub boldy. Fransiýaly hüjümçi 61-nji minutda goragçylaryň we derwezeçiniň uly ýalňyşlygyndan peýdalanyp, hasaby deňledi. Ol 76-njy we 78-nji minutlarda-da tapawutlanyp, hasaby 3-1-e, “Real Madridi” bolsa çärýek finala çykardy. Galan minutlarda PSŽ-li futbolçylaryň eden tagallalary oňyn netije bermedi. Şeýlelikde, kubogy iň köp eýelän “Real Madrid” topary 18-nji, umumylykda 37-nji gezek çärýek finala çykmagy başardy. Karim Benzema 34 ýaş 80 gün bilen UÇL-de het-trik eden iň ýaşuly futbolçy hökmünde hasaba alyndy. Bu onuň Çempionlar Ligasynda 2-nji het-trigidir. Benzema Çempionlar Ligasynda kalendar senenamasy boýunça yzly-yzyna 18 ýyl (2005-2022) gol geçiren ilkinji futbolçy boldy. Benzemanyň “Realdaky” gollarynyň sany 309-a ýetip, ol Alfredo Di Stefanony yzda galdyrdy. Benzemadan öňde Raul (323) bilen Kristiano Ronaldo (450) bar.
Kilian Mbappe bolsa PSŽ-däki 157-nji goluny geçirip, Zlatan Ibrahimowiçden öňe saýlandy. Ol Çempionlar Ligasyndaky soňky 14 duşuşykda 14 gol geçirdi.
