Italiýanyň çempionaty Serie A-da sanawyň lideri Milan ýene bir ýola öz meýdançasynda utuk ýitirdi. Bolonýa bilen golsuz deňme-deň oýnan Milan toparynyň oýunçylarynyň uran 33 urgusynyň biri-de derwezä girmedi. Bolonýa toparynyň derwezeçisi ussatlarça oýun görkezip, toparyny ýeňlişden halas etdi. Şeýlelikde, Milan häzirlikçe 1-nji orunda bolsa, 3 utuklyk aratapawudy saklap bilmedi. Geçen möwsümde Ýewropanyň TOP 5 çempionatynyň myhmançylykda iň köp utuk toplan topary bolan Milan bu möwsümde-de öz meýdançasynda utuk ýitirmegini dowam edýär. Ýogsam Bolonýa toparyny Milan soňky duşuşyklarynda uly hasaplar bilen ýeňip gelýärdi.
Klub 31 oýunda 7 gezek deňme-deň oýnady, 4 sapar hem utuldy. Şol ýeňlişleriň 3-si, deňme-deňlikleriň hem 4-si Juseppe Meazza stadionynda hasaba alyndy. Ýagny Milan 31 oýunda ýitiren 26 utugynyň 17-sini öz meýdançasynda ýitirdi. Milan topary indiki tapgyrda myhmançylykda Torino bilen duşuşar.
