Angliýanyň çempionatynda 4-nji ýere ymtylýan Mançester Ýunaýted öz meýdançasynda ligada galmak ugrunda göreşýän Norwiç Sitini 3-2 hasabynda ýeňdi. Oýunda super ýyldyz Kristiano Ronaldo het-trik edip, toparyna ýeňiş getiren futbolçy boldy. Ol 7-nji, 32-nji hem-de 76-njy minutlarda tapawutlanmagy başardy. Mundan öňki gol geçiren duşuşygynda-da het-trik eden Ronaldonyň şu möwsümdäki het-trikleriniň sany 2-ä ýetdi. Ol klublardaky 50-nji (Realda – 44, Ýuwentus – 3, M. Ýunaýted – 3), şeýle-de karýerasyndaky 60-njy het-trigini etdi. Ol şu asyrda klublarda 50 het-trik eden ilkinji futbolçy boldy. Ronaldo het-trikleriniň 30-syny 30 ýaşdan öň, galan 30-syny hem 30 ýaşdan soň etdi. Şeýle-de ol Premier Ligada bir möwsümde 15 gol geçiren iň ýaşuly futbolçy hökmünde hasaba alyndy. Ronaldo ýene-de 1 gol geçirse, onda ol Premier Ligada 100 gol geçiren futbolçylaryň sanawyna adyny ýazdyrar.
Ronaldo Norwiç duşuşygynda erkin urgudan 1 gol geçirip, bu görnüşdäki gollarynyň sanyny 58-e ýetirdi we Lionel Messi bilen deňleşdi.
