Meksikanyň Leon şäherinde dowam edýän agyr atletika boýunça ýaşlaryň arasyndaky Dünýä çempionatynda ildeşimiz kümüş medal gazandy. Erkekleriň arasynda 96 kilogram agrama çenli derejede çykyş eden Saparly Muhyýew dünýäniň wise-çempiony boldy. Aşgabat şäheriniň sport we ýaşlar syýasaty Baş müdirliginiň 6-njy sport mekdebiniň türgeni bolan Saparly Muhyýew birbada götermekde 133 kg agramy galdyrdy. Onuň bu görkezijisi ikinji ýere mynasyp boldy. Ol itekläp götermekde 167 kg agramy göterip, üçünji orny eýeledi. Umumylykda 300 kilogram agramy galdyran ýaş pälwan kümüş medala mynasyp boldy. Bu agram derejesinde altyn medaly gruziýaly Gerwasi Tabagari eýeledi (140 kg, 177 kg, 317 kg). Münberiň üçünji ornuna bolsa ildeşimiz bilen deň agramy galdyran meksikaly Pablo Medina çykdy. Şeýle-de bu agram derejesinde bäsleşen başga bir ildeşimiz Surajbek Sapaýew umumylykda 292 kg agram bilen 5-nji ýeri eýeledi.
Ýeri gelende aýtsak, erkekleriň arasyndaky 55 kg agram derejesinde Perhat Bagtyýarow itekläp götermekde 125 kg agram bilen kiçi kümüş medala mynasyp boldy.
Gyzlaryň arasynda-da 59 kg agramda ýaryşan Medine Amanowa birbada götermekde 83 kg agramy galdyryp, kiçi bürünç medal gazanypdy.
