Şu gün, 5-nji sentýabrda paýtagtymyzdaky “Arçabil” myhmanhanasynda «Garaşsyz Türkmenistan halkara habarlar giňişliginde» atly halkara maslahat geçirildi. Halkara foruma Türkmenistanyň Döwlet habarlar agentliginiň, Telewideniýe, radiogepleşikler we kinematografiýa baradaky döwlet komitetiniň, köpçülikleýin habar beriş serişdeleriniň ýolbaşçylary, žurnalistler, şeýle-de sanly ulgam arkaly daşary ýurtlaryň habar beriş serişdeleriniň wekilleri gatnaşdylar.
Şeýle hem myhmanhanada Türkmenistanyň Garaşsyzlyk ýyllary içinde gazanan üstünliklerine, ýeten belent sepgitlerine bagyşlanan sergi giňden ýaýbaňlandyryldy.
Halkara maslahatda ýurdumyzyň köpçülikleýin habar beriş serişdeleriniň wekilleriniň, ýokary okuw mekdepleriniň mugallymlarynyň we talyplarynyň çykyşlary diňlenildi. Şeýle hem maslahatda ýurdumyzda akkreditirlenen žurnalistlerden başga-da çärä onlaýn görnüşinde daşary ýurt KHBS-niň wekilleri hem çykyş etdiler. Çykyşlarda ýurdumyzda soňky ýyllarda köpçülikleýin habar beriş serişdeleriniň sanynyň artandygy, hiliniň ýokarlanandygy mälim edildi. Ýurdumyzyň baý taryhy, medeniýeti, dürli ugurlarda gazanylýan üstünlikler baradaky maglumatlaryň, makalalaryň, wakalaryň we habarlaryň daşary ýurt habar beri serişdelerinde giň orun tapýandygyna üns çekildi.
Sanly wideoaragatnaşyk arkaly çykyş eden daşary ýurtlaryň habar beriş serişdeleriniň hem-de halkara guramalaryň wekilleri ýurdumyzyň halkara habarlar giňişliginde eýeleýän mynasyp ornuny, türkmen žurnalistleriniň elektron saýtlar arkaly işlemekleri, ýurduň täzeliklerini, ösüşlerini dünýä ýaýmaklary üçin döredilýän giň mümkinçilikleriň bardygyny bellediler. Halkara maslahatyň barşynda daşary ýurtly hyzmatdaşlar bilen ozal baglaşylan halkara resminamalaryň ýerine ýetirilişi, köpçülikleýin habar beriş serişdeleri ulgamyndaky gatnaşyklary mundan beýläk-de pugtalandyrmak babatda geljekki edilmeli işler we öňde durýan wezipeler barada pikir alyşmalar boldy.
