El telefonyndaky ýa-da kompýuterdäki oýunlar ilkibaşda aňsat hem bolsa, soňky tapgyrlara geçilmegi bilen kynlaşyp başlaýar. Ýetilen tapgyrdan geçip bilmezlik bolsa, içgysgynç bolup bilýär. Koreý alymlary oýunçynyň duýgularyna oýundaky maglumatlaryň kömegi bilen baha berip, oýunçynyň göwnünden turmak üçin kynçylyk derejesini düzedýän täze çözgüdi döretdiler. Gözlegçileriň işi oýunlaryň kynlygyny deňleşdirmäge we oýunlary ähli oýunçylara has özüne çekiji etmäge kömek edýär.
“Popular Science’ žurnalynda çap edilen habara görä, kynçylyk derejesi kompýuter oýunlarynyň kyn tarapy. Käbir adamlar kyn bolany üçin wideo oýunlaryny halaýarlar, käbirleri aňsat tejribeden lezzet almagy makul bilýärler. Köp döredijiler bu prosesi aňsatlaşdyrmak üçin “dinamiki kynçylygy sazlamak (DDA)” ulanýarlar.
DDA oýnuň kynçylyk derejesini oýunçynyň ýerine ýetirişine baglylykda hakyky wagtda sazlamaga mümkinçilik berýär. Mysal üçin, oýunçynyň öndürijiligi belli bir kynçylyk derejesine taýýarlaýjynyň garaşyşlaryndan ýokary bolsa, oýnuň DDA guraly kynçylyk derejesini awtomatiki ýokarlandyrýar. Peýdaly bolsa-da, bu strategiýa diňe oýunçynyň öndürijiligini göz öňünde tutýar we oýunçylaryň aslynda näçeräk hezil edýändigine seredip bilenok.
Gwangju Ylym we Tehnologiýa institutynyň gözleg topary bu DDA çemeleşmesini “Expert Systems With Applications”-da neşir edilen täze gözlegde birneme üýtgetmek kararyna geldi.
Alymlar oýunçynyň işine ünsi jemlemegiň ýerine, oýunçynyň kanagatlanmagy bilen baglanyşykly dört elementiň birini (kynçylyk, ussatlyk, erkin geplemek we özüne çekiji gymmaty) ulaltmak üçin oýnuň kynlygyny sazlaýan DDA gurallaryny döretdiler. DDA gurallary dürli hyýaly hakykat oýunlaryny oýnaýan, soň bolsa tejribeleri barada anketany doldurýan hakyky adam oýunçylaryndan toplanan maglumatlary ulanyp, maşyn öwrenmek usuly bilen taýýarlanýar.
Maksat TAGANOW, Magtymguly adyndaky Türkmen döwlet uniwersitetiniň talyby.
