UEFA Çempionlar Ligasynda “H” toparçada Ysraýylyň Haýfa şäherinde oýnalan “Makkabi”–PSŽ duşuşygynda parižliler 3-1 hasabynda ýeňiş gazandy. Ýer eýeleri 24-nji minutda Çeriniň goly bilen öňe saýlansa-da, 37-nji minutda super ýyldyz Lionel Messi hasaby deňledi. “Makkabi Haýfa” Messiniň gol geçiren 39-njy kluby bolup, ol bu ugurda Ronaldodan öňe saýlandy. Şeýle-de Messi Çempionlar Ligasynda bassyr 18-nji möwsüminde-de gol geçirmegi başardy. Ol bu görkezijä ýeten ilkinji futbolçydyr. 2-nji ýarymda-da PSŽ super ýyldyzlary Mbappe we Neýmaryň owadan gollary bilen 3-1 hasabynda ýeňiş gazanmagyň hötdesinden geldi.
Toparçanyň beýleki duşuşygynda “Ýuwentus” öz meýdançasynda “Benfika” bilen duşuşyp, 4-nji minutda Arkadiuş Milik turinlileri öňe saýlady. Ýöne soňlugy bilen, portugal topary 2-1 hasabynda ýeňiş gazanyp, 1997-nji ýyldan Italiýadan 3 utuk bilen dolanmagy başardy. Lissabonlylara ýeňiş getiren gollary 43-nji minutda penaltiden Žoao Mario, 53-nji minutda-da täze transfer Neres geçirdi. “Ýuwentus” topary taryhynda ilkinji gezek Çempionlar Ligasyna 2 ýeňliş bilen başlady.
