11 döwletiň ýolbaşçylary Gazagystanyň paýtagty Astanada Aziýada özara hyzmatdaşlyk we ynamy berkitmek çäreleri boýunça Geňeşiniň (CICA) 6-njy sammitine gatnaşmak üçin ýygnanyşarlar. Bu barada Gazagystanyň daşary işler ministrliginiň resmi wekili Aýbek Smadiýarow mälim etdi.
Onuň sözlerine görä, CICA-nyň 6-njy sammiti 12-13-nji oktýabr aralygynda paýtagt Astanada Gazagystanyň Prezidenti Kassym-Žomart Tokaýewiň ýolbaşçylygynda geçiriler.
Sammite Türkiýäniň Prezidenti Rejep Taýýip Erdogan, Russiýanyň Prezidenti Wladimir Putin, Eýran Yslam Respublikasynyň Prezidenti Ebrahim Raisi, Azerbaýjanyň Prezidenti Ilham Aliýew, Yragyň Prezidenti Barham Salih, Palestinanyň Prezidenti Mahmud Abbas, Özbegistanyň Prezidenti Şawkat Mirziýoýew, Gyrgyzystanyň Prezidenti Sadyr Japarow, Täjigistanyň Prezidenti Emomali Rahmon we Kataryň Emiri Şeýh Tamim bin Hamad Al Tani gatnaşar. Belarusyň Prezidenti Aleksandr Lukaşenko hem sammite synçy hökmünde çagyryldy.
Aziýa yklymynyň, takmynan, 90 göterimi CICA wekilçilik edýär. Sammite CICA agza 27 ýurtdan 50 töweregi wekiliýet gatnaşar. -CICA-nyň altynjy sammiti diňe bir sebitde däl, eýsem, tutuş yklymda hem esasy syýasy çärä öwrüler – diýip, Aýbek Smadiýarow belledi. Şeýle hem, Smadiýarow Astanada guraljak Aziýada özara hyzmatdaşlyk we ynamy berkitmek çäreleri boýunça Geňeşiň (CICA) sammitinden soň 14-nji oktýabrda GDA-nyň döwlet Baştutanlarynyň sammitiniň geçiriljekdigini belledi.
