Albaniýanyň Durres şäherinde badalga alan agyr atletika boýunça ýaşlaryň arasyndaky Dünýä çempionatynda ildeşlerimiz şowly başlady. 45 kg agram derejesinde çykyş edýän ildeşimiz, Aşgabat şäherindäki 104-nji orta mekdebiň 8-nji synp okuwçysy Ogulşat Amanowa ýetginjek gyzlaryň arasynda dünýäniň çempiony boldy. Ol birbada götermekde 71 kg agramy galdyryp, kiçi kümüş medaly eýeledi. Itekläp götermekde-de 85 kg, umumylykda 156 kg agramy galdyran filippinli, hindistanly, kolumbiýaly, türkiýeli, wýetnamly, ekwadorly, ýaponiýaly türgenlerden öňe saýlanyp, altyn medaly gazanmagy başardy. Bu agram boýunça umumylykda 155 kg agramy galdyran filippinli Anjeline Kolonia kümüş, 150 kg agramy göteren hindistanly Akankşa Wýawahare bürünç medala mynasyp boldy.
Şeýle-de, ýetginjek oglanlaryň arasynda-da 61 kg agramda çykyş eden Perhat Bagtyýarow kümüş medal gazandy. Birbada götermekde 114 kg agramy galdyran Perhat kiçi altyn medala mynasyp boldy. Ol bu ugurda wýetnamly K’Brumdan (113 kg) hem-de hindistanly Tinku Golomdan (112 kg) üstün çykdy. Itekläp götermekde ildeşimiz 144 kg agramy galdyrdy. Perhat Bagtyýarowdan 5 kg artyk göteren filippinli Albert Delo
s Santos 149 kg agramy, jemi 259 kg agram bilen altyn medala mynasyp boldy. 1 kg agram az göteren ildeşimiz Perhat Bagtyýarow bolsa kümüş medal gazandy. 3-nji orny 255 kg agramy galdyran wýetnamly K’Brum eýeledi. Ýeri gelende aýtsak, Perhat Bagtyýarowyň geçen ýylky çempionatda-da 55 kg agramda itekläp götermekde kiçi kümüş medal gazanandygyny belläliň.
25-nji martda başlan çempionat 1-nji aprelde tamamlanar. Çempionata 57 ýurtdan jemi 268 türgen gatnaşar.
