Bütindünýä Saglygy Goraýyş Guramasynyň başlygy Tedros Adanom Gebreýesus “COVID-19” ýokanjy bilen bagly dünýäde 2020-nji ýyldan bäri dowam edip gelýän adatdan daşary ýagdaýyň tamamlanandygyny yglan etdi. Ol bu barada Ženewada geçirilen metbugat üçin maslahatda guramanyň hünärmenleriniň teklibi bilen ylalaşyp, beýanat berdi diýip, “Euronews.com” ýazýar.
-Men uly umyt bilen dünýä derejesinde adatdan daşary ýagdaý hökmünde ýüze çykan “COVID-19” ýokanjynyň tamamlanandygyny mälim edýärin. Häzirki wagtda bütin dünýäde ýokanç bilen bagly ölümiň derejesi görnetin pese gaçdy hem-de ilatda “SARS-CoV-2” wirusyna garşy ýokary immunitet kemala geldi – diýip, Gebreýesus belledi.
BSGG-niň hasaplamalaryna görä, koronawirusdan 20 million adam heläk boldy. Ýokanç bilen 765,2 million adam keselledi. Bütindünýä Saglygy Goraýyş Guramasy “COVID-19” keselini pandemiýa diýip, 2020-nji ýylyň 11-nji martynda yglan etdi. Ol 3 ýyl 1 aý we 24 gün dowam etdi.
