Italiýanyň ozalky Premýer-ministrlerinden, dünýä belli syýasatçy, işewür, media hojaýyny Silwio Berluskoni 86 ýaşynda aradan çykdy. Ol 2 aýa golaý wagt bäri leýkoz keselinden ejir çekýärdi. Milan şäherindäki San Raffaele keselhanasynda aradan çykan Berluskoniniň köp ýyldan bäri ýürek keseli hem bardy.
1936-njy ýylyň 29-njy sentýabrynda Milan şäherinde dünýä inen Berluskoni 4 döwür Italiýanyň Premier-ministri wezipesinde işledi. Ol 1994-1995-nji ýyllarda, 2001-2006-njy ýyllarda hem-de 2008-2011-nji ýyllar aralygynda Italiýanyň hökümet baştutany boldy. Berluskoni 1994-nji ýylda “Forza Italia” esaslandyryp, 2009-njy ýylda ol partiýa ýapylýar. Şondan soň “Halkyň azatlygy” partiýasyny gurýar. 2013-nji ýylda-da täzeden “Forza Italia” partiýasyny dikeldýär.
Italiýanyň iň baý 3-nji şahsyýeti bolan Berluskoni ýurduň meşhur futbol kublarynyň biri bolan “Milan” toparynyň hem ozalky eýesidi. Milan kluby 1986-2017-nji ýyllarda aralygynda Berluskoniniň eýeçiliginde Ýewropada hem-de ýurtda uly ýeňişler gazandy. Häzirki wagtda-da “Serie A”-da çykyş edýän “Monza” klubuna eýeçilik edýän Berluskoni 2 gezek öýlendi. Özboluşly şahsyýet hökmünde görülýän Berluskoni “Fininvest” holdinginiň, şol sanda “Mediaset” media kompaniýasynyň eýesidi.
