Häzirki wagta çenli onlarça adam syýahatçylyk maksady bilen kosmos giňişligine çykdy. Olaryň köpüsi birnäçe günläp asman giňişliginde bolan bolsalar, käbiri atmosferanyň gutaryp, kosmosyň başlanýan ýerine az wagtlyk baryp gaýtdylar. Ýagny Ýeriň dartyş güýjüniň azalyp başlanýan ýerine – kosmosyň bosagasyna bardylar. Angliýanyň «Virgin Galactic» kompaniýasy bolsa, kosmosa yzygiderli gatnawy ýola goýmak üçin birnäçe ýyldan bäri iş alyp barýar. Kompaniýanyň ilkinji uçuşynyň 27-30-njy iýun aralygynda amala aşyryljakdygy we bu uçuşa italiýaly üç bilermeniň gatnaşjakdygy mälim edildi. Awgust aýynda bolsa, «Galactic 02» atly täjirçilik maksatly uçuş amala aşyrylar.
Kompaniýa bir petegiň bahasynyň 450 müň dollardygyny, häzire çenli 800 adamyň ýer belledendigini mälim etdi. Kompaniýanyň ýolbaşçysy Maýkl Kolglazýer kosmosa ylmy barlaglar we täjirçilik maksatly gatnawlaryň ýola goýulýandygyny aýtdy.
Howa gämisi Ýerden 80 kilometr belentlige çykyp, birnäçe minutlap, Ýeriň dartyş güýjüniň duýulmaýan gatlagynda galar. Kompaniýa ilkibaşda ýylda birnäçe uçuşy amala aşyrar. Soňlugy bilen gatnawyň artdyrylmagyna garaşylýar.
Gurbansoltan REJEPOWA,
S.A.Nyýazow adyndaky Türkmen oba hojalyk uniwersitetiniň talyby.