PDF
Özbegistanyň Çyrçyk şäherinde 17 ýaşa çenli türgenleriň arasynda geçirilen Merkezi Aziýanyň açyk çempionatynda Türkmenistanyň agyr atletikaçylary dört kümüş we bir bürünç medal gazandylar.
Birinjilik baýraklary ugrunda 8 ýurtdan 51 türgen bäsleşdi. Oňa Türkmenistandan 3 oglan we 3 gyz, jemi 6 türgen gatnaşdy.
Kümüş medala dört agyr atletikaçy gyzyň bäsleşen 45 kilograma çenli agram toparynda Daşoguz welaýatynyň Akdepe etrabyndaky 100-nji orta mekdebiň 8-nji synp okuwçysy Şabnam Kerimbaýewa mynasyp boldy. Onuň görkezen netijesi 117 kg (silkip galdyrmak – 54 kg, itekläp galdyrmak – 63 kg).
“Olimp” sport mekdebiniň 9-njy synp okuwçysy Didarbek Jumabaýew-de hut şunuň ýaly üstünlik gazandy. Ol üç türgeniň baýrak ugrunda bäsleşen 67 kilograma çenli agram toparynda çykyş etdi. Ýaryşyň jeminde ol 230 kg netije görkezdi (silkip galdyrmaka – 103 kg, itekläp galdyrmak –127 kg).
Hormat münberiniň ikinji basgançagyna Mary welaýatynyň Sakarçäge etrabyndaky 1-nji orta mekdebiň 10-njy synp okuwçysy Mähriban Täçmyradowa-da çykdy. Ol üç türgeniň medal ugrunda göreşen 71 kg-dan ýokary agram toparynda iki maşkyň jemi boýunça 125 kg gazandy (silkip götermek – 60 kg, itekläp götermek – 65 kg).
Türkmenistanyň toparynda ýene bir kümüş medaly Mary welaýatynyň Sakarçäge etrabyndaky 27-nji orta mekdebiň 10-njy synp okuwçysy Galkan Rahmanow gazandy. Ol bu üstünlige Özbegistandan we Gyrgyzystandan gelen iki türgen bilen bolan çekeleşikde 81 kilograma çenli agram toparynda iki görnüşli ýaryşda 265 kg (silkip galdyrmak – 120 kg, itekläp galdyrmak – 145 kg) jemlemek bilen ýetdi.
Toparymyzda bürünç baýraga Balkan welaýatynyň Balkanabat şäherindäki 28-nji orta mekdebiň 9-njy synp okuwçysy Maýagözel Hurmenowa mynasyp boldy. Ol üç türgeniň medal ugrunda bäsleşen 55 kilograma çenli agram toparynda iki ýaryşda 120 kg netije görkezdi (silkp galdyrmak – 55 kg, itekläp galdyrmak – 65 kg).
