14-nji iýulda Hindistan robot barlag geçirijisini Aýyň günorta polýusyna alyp gitmäge niýetlenen “Çandraýan-3” raketasyny üstünlikli uçurdy. “Satiş Dhawan” adyndaky kosmos merkezi tarapyndan ýakyndan gözegçilik edilýän bu missiýa 14 gün dowam edip, oňa takmynan, 75 million dollar sarp ediler.
Enjam Aýa golaý orbita girmeli. Soňra bolsa, Aýyň üstüne emaý bilen gonar. Bu wakanyň 23-24-nji awgustda bolmagyna garaşylýar. Mundan başga-da, gözleg enjamlary bilen abzallaşdyrylan lunohod Ýeriň tebigy hemrasynyň ýüzüne himiki barlag işlerin geçirer.
Eger-de ähli zat ugruna bolsa, Hindistan Aýa gonan dört ýurduň birine öwrüler (Russiýa, ABŞ we Hytaýdan soň). Bu hindi kosmonawtlary üçin eýýäm üçünji missiýadyr.
2019-njy ýylda edilen öňki synanyşyk şowly bolmandy. Raketa Aýyň ýüzüne düşmezden öň, Ýer bilen aragatnaşygyny ýitiripdi.
