AFK Çempionlar Ligasynda toparçalardaky 2-nji duşuşyklara badalga berildi. «E» toparçada Saud Arabystanynyň wekil «Al Nassr» topary öz meýdançasynda Täjigistanyň «Istiklol topary bilen duşuşdy. Çekeleşikli geçen oýunda myhmanlar 1-nji ýarymda 1-0 öňe saýlandy. Bu goly 44-nji minutda täjik klubunyň kot-d’iwuarly hüjümçisi Senin Sebai geçirdi. Ýöne 2-nji ýarymda has gysyş görkezen arap kluby ýyldyzlarynyň gollary bilen ýeňiş gazanmagy başardy. 66-njy minutda super ýyldyz Kristiano Ronaldo hasaby deňledi. 72-nji minutda Anderson Talişka «Al Nassr» toparyny öňe çykaryp, ol 77-nji minutda-da oýna soňky nokady goýdy. Şunlukda, 3-1 hasabynda ýeňiş gazanan «Al Nassr» 2-nji duşuşygynda-da 3 utugy almagy başardy.
Duşuşykda portugaliýaly super ýyldyz Kristiano Ronaldo AFK Çempionlar Ligasyndaky ilkinji goluny geçirdi. Toparçadaky beýleki duşuşykda «Persepolis» (Eýran) myhmançylykda «Al-Duhail» (Katar) toparyny Alişahyň 63-nji minutdaky goly bilen 1-0 utdy.
AFK Çempionlar Ligasynda «C» toparçada Özbegistanyň AGMK topary öz meýdançasynda Yragyň «Al-Kuwa Al-Jawiýa» toparyndan 2-1 asgyn geldi. «Sepahan» bilen «Al-Ittihadyň» arasyndaky oýun käbir sebäplere görä geçirilmedi. Netijede, Eýranyň «Sepahan» toparyna 3-0 tehniki ýeňlişiň berilmegine garaşylýar.
