Ibn Battuta ady bilen meşhur bolan Abu Abdullah Muhammed ibn Abdullah at-Tanji 1304-nji ýylyň 25-nji fewralynda Tanjerde (Marokko) dünýä inýär. Ibn Battutanyň özi barada maglumatlar juda az. Dünýä belli syýahatçynyň giňden tanalýandygyna garamazdan, arap çeşmelerinde ol barada diňe bir-iki jümlä gabat gelmek bolýar. Olaryň biri beýik yslam akyldary Ibn Haldunyň (1332-1406) “Al-mukaddima” (“Giriş”) atly belli eserinde bellenip geçilýär. Beýlekisi XV asyryň belli palestin taryhçysy Ibn Hajar al-Eskelaniniň (1448-nji ýylda aradan çykan) biografik sözlüginde ýatlanyp geçilýär. Şu nukdaýnazardan “Şäherleriň täsinliklerine we saparyň ajaýyplyklaryna nazar aýlanyň sowgady” atly eseri onuň özi baradaky ýeke-täk çeşme bolup hyzmat edýär. Bu eserde beýan edilişine görä, ol dini bilimi alypdyr, şygryýeti öwrenipdir, käwagt hem goşgy goşupdyr. Ibn Battutanyň beýik syýahaty 22 ýaşyndaka 1325-nji ýylyň 13-nji iýunynda Tanjerden Mekgä we Medinä zyýarat etmek maksady bilen başlaýar. Ol 28 ýyl töweregi syýahatda bolup, jemi 44 ýurda baryp görýär.
Ibn Battuta öz syýahatynyň dowamynda Demirgazyk we Günbatar Afrikada, Arap ýarym adasynda, Hindistanda, Hytaýda, Andalusiýada, Türkiýede, Yrakda, Eýranda, Owganystanda, Günorta-Gündogar Aziýada we Gündogar we Günorta Ýewropada we beýleki ýerlerde bolup görýär. Ol 1353-nji ýylda bu syýahatdan gaýdyp gelip, özüniň akyla sygmajak syýahatlary barada ýatlamalaryny ýazyp ugraýar we şondan soň, Marokkanyň Fes şäherinden hiç ýere çykmaýar.
Belli arapşynas I. Ý. Kraçkowskiý Ibn Battutany köp ýurtlara baryp gören geografiýadan köpugurly hünärmen hökmünde baha berýär. Hasaplamalara görä, ol 120 müň kilometr ýoly külterläpdir. Ol 1377-nji ýylda aradan çykýar.