15-nji ýanwarda Şweýsariýanyň Dawos şäherinde Bütindünýä ykdysady forumy (WEF) öz işine başlady. Maslahata 60-dan gowrak döwlet we hökümet baştutanlary, şeýle hem ýüzlerçe işewür wekiller gatnaşýarlar. Şeýle hem foruma Birleşen Milletler Guramasy, Bütindünýä Saglygy Goraýyş Guramasy, Halkara Pul Gaznasy ýaly halkara guramalaryň we maliýe edaralarynyň ýolbaşçylary we hökümete degişli bolmadyk 40-a golaý guramanyň wekilleri gatnaşýar. Olaryň arasynda Fransiýanyň Prezidenti Emmanuel Makron, Ukrainanyň Prezidenti Wladimir Zelenskiý, Hytaýyň Premiýer-ministri Li Sýan, ABŞ-nyň daşary işler ministri Entoni Blinken ýaly syýasatçylar, Ýewropa Merkezi bankynyň başlygy Kristin Lagard, Halkara Pul Gaznasynyň başlygy Kristalina Georgiýewa we Germaniýanyň maliýe ministri Kristian Lindner ýaly maliýe edaralarynyň ýolbaşçylary bar.
“Bölünen dünýäde howpsuzlyk we hyzmatdaşlyk”, “Täze döwürde ösüşi we iş orunlaryny döretmek”, “Ykdysadyýetde we jemgyýetde hereketlendiriji güýç hökmünde emeli aň” we “Klimat boýunça uzak möhletleýin strategiýa, tebigat we energiýa” maslahatyň esasy temalarydyr. Bu ýylyň esasy şygary bolsa, “Ynamy dikeltmek” boldy.
-Bu biziň 54-nji ýyllyk maslahatymyz bolup, ol soňky onýyllyklaryň iň kyn geosyýasy we geoykdysady fonunda geçirilýär. Duşuşykda bolup geçýän wakalary göz öňünde tutup, gyssagly ynamy dikeltmeli – diýip, Gündogar ykdysady forumynyň başlygy Borge Brende belledi.
Nemes ykdysatçysy Klaus Şwab tarapyndan esaslandyrylan forum Ýewropa kompaniýalarynyň dolandyryjylyk işlerini kämilleşdirmäge gönükdirilendir. Gurama 1987-nji ýylda häzirki adyna eýe bolýar, 2015-nji ýylda bolsa, halkara gurama hökmünde ykrar edilýär. Dawosda 1971-nji ýyldan bäri geçirilýän Bütindünýä ykdysady forumynda adamzat jemgyýetiniň ykbalyna gönüden-göni täsirini ýetirýän wajyp meseleler ara alnyp maslahatlaşylýar. Dünýäniň sosial-ykdysady ýagdaýynyň has-da gowulanmagy, iri ykdysady we syýasy bileleşikleriň, aýry döwletleriň, korporasiýalaryň, kompaniýalaryň bähbitleriniň gabat gelmegi forumyň iň esasy maksady bolup durýar. Islendik meseläni resmi däl ýagdaýda maslahatlaşmak mümkinçiligi forumyň iň esasy aýratynlyklarynyň biridir. Ştab-kwartirasy ýurduň Koloni şäherinde ýerleşýän foruma gatnaşýan döwletleriň sany artýar. Häzirki wagtda dünýäniň dürli ýurtlarynyň 1000-den gowrak kompaniýalary we guramalary bu forumyň agzasy bolup durýarlar. Şeýle hem guramanyň hünärmenleri dürli ýurtlaryň bäsleşige ukyplylygy baradaky hasabatlary her ýylda mälim edip durýarlar. Onuň býujeti foruma gatnaşyjylaryň geçirýän agzalyk gatançlarynyň we serişdeleriniň hasabyna döredilendir.
Maslahatyň işi 19-njy ýanwara çenli dowam eder.
