Türkmen tennisçisi Ilima Guseýnowa Maskatda (Oman) 14 ýaşa çenli ýetginjekleriň arasynda Merkezi we Günbatar Aziýanyň saýlama çempionatynyň çempiony boldy. Iki tapgyrdan ybarat ýaryşa 13 ýurduň wekilleri gatnaşdy.
Iki ýaryşyň jemi boýunça Ilima ýekelikde iki altyn, Aýlar Kakabaýewa bilen bilelikde çykyş edip hem iki kümüş medal eýeledi.
Ilkinji altyn medal ugrunda bäsleşikde Türkmenistanyň 13 ýaşyndaky ilkinji raketkasy çärýek finalda Tali Essam Ali Al Busaýdi (Oman) – 6:0, 6:0, ýarym finalda Asal Farahbodniai (Eýran) – 6:2, 6:2 hasabynda ýeňdi we finalda Eýranyň beýleki bir wekili Hana Şabanpurdan 6:4, 6:4 hasabynda üstün çykdy.
Ikinji altyn medal Ilima kyn düşdi. Çärýek finalda Arin Al Azkawini (Oman) – 6:1, 6:1 we ýarym finalda bolsa Asal Farahbodniai (Eýran) – 6:1, 6:4 hasaby bilen ýeňiş gazansa-da, 3,5 sagat dowam eden finalda ildeşimiz üçünji torda ýitirildi – 2:5 hasabynda ýeňilýärdi. Ýöne muňa garamazdan, erjellik bilen 4:6, 6:1, 7:5 hasabynda ýeňiş gazanmagy başardy.
Ilima Guseýnowa bilen Aýlar Kakabaýewa bilelikde oýnap ilkinji ýaryşda Omandan Tali Essam Ali Al Busaýdini we Salma Issa Al Riýamini – 6:0, 6:1, finalda bolsa Eýrandan Golsa Rahimianamiri/Hana Şabanpour – 4:6, 7:6 (4), 1:10 hasabynda ejiz geldiler. Ikinji ýaryşda ýarym finalda türkmen tennisçileri halkara jübüti Tal Essam Ali Al Busaýdiden (Oman)/Asal Farahbodniaiden (Eýran) 6:1, 6:0 hasabynda rüstem gelseler-de, çekeleşikli finalda eýranly Golsa Rahimianamiriden/Hana Şabanpurdan 6:3, 3:6, 10:12 hasabynda utuldylar.
12 ýaşly Aýlar Kakabaýewa paýtagtymyzdaky Saparmyrat Nyýazow adyndaky aýratyn zehinli çagalar orta mekdebiniň 7-nji synpynda okaýar we Aşgabadyň Bedenterbiýe we sport Baş müdirliginiň 10-njy mekdebinde Jennet Hallyýewadan tälim alýar. 14-nji martda 14 ýaşy dolýan, Aşgabat şäherindäki ýöriteleşdirilen 42-nji orta mekdebiniň sekizinji synp okuwçysy Ilima Guseýnowa bolsa, Türkmenistan milli ýygyndysynyň baş tälimçisi Mirali Gasanowyň ýolbaşçylygynda «Aşgabat» tennis akademiýasynda ussatlygyny ýokarlandyrar. Geçen ýyl bu 30 ýaşly hünärmen Türkmenistanda tennis tälimçileriniň arasynda ilkinji bolup dünýäniň islendik ýurdunda professional oýunçylar bilen işlemäge hukuk berýän PRO tälimçilik derejesini aldy 28-nji dekabrda bolsa Türkmenistanyň Tennis federasiýasynyň her ýyl geçirilýän maslahatynda TTF-niň başlygynyň orunbasarlygyna saýlandy. 2023-nji ýyl hem onuň şägirdi Ilima Guseýnowa üçin hem şowly boldy. Aşgabatda gyzlaryň arasynda geçirilen ýaryşda Türkmenistanyň çempiony diýen ady saklap galdy we dekabr aýynda ikinji gezek ýurduň Kubogyny eýeledi. Isa-Taun şäherinde (Bahreýn) geçirilen Merkezi we Günbatar Aziýanyň ýaryşynda (14 ýaşa çenli) öňki saýlama çempionatynda Ilima birinji ýaryşda kümüş, ikinjisinde bürünç medal eýeledi. Mundan başga-da, Bhubanewar şäherinde (Hindistan) geçirilen Aziýanyň (U-14) birinjiliginde kümüş medala mynasyp boldy. Umumy hasapda TTF-niň kazylar toparynyň başlygy Igor Zubkowyň bäsleşige ýolbaşçylyk eden Türkmenistanyň topary ikinji orun eýeläp, Aziýa çempionatynda (U-14) gatnaşmaga hukuk gazandy. Birinji orna Eýranyň topary, Ýemeniň topary üçünji orna mynasyp boldular.
Ýetginjekleriň arasynda Merkezi we Günbatar Aziýa üçin häzirki saýlama çempionaty – ITF Asia 14&U Development Championships – 2024-nji ýylda türkmen tennisçileri üçin ilkinji halkara ýaryşydy.
