PDF
AFK Kubogynyň täze möwsüminde ýurdumyzyň adyndan iki klub çykyş eder. Düýn toparçalaryň bijeleri çekildi. Bijä laýyklykda, “Altyn asyr” hem-de “Ahal” toparlary Merkezi Aziýa zolagynyň toparçalarynda çykyş eder. Ýurdumyzyň çempiony “Altyn asyr” “F” toparçada Özbegistanyň AGMK ýa-da “Nasaf”, Täjigistanyň “Hojand” hem-de Gyrgyz Respublikasynyň “Alaý” toparlary bilen duşuşar. Häzirki wagtda Özbegistanyň AGMK topary AFK Çempionlar ligasy ýaryşyna-da dalaş edýär. Eger saýlama tapgyryny şowly tamamlasa, onda “Nasaf” topary “Altyn asyryň” bäsdeşi bolar.
Wise-çempion “Ahal” bolsa, “E” toparçada Täjigistanyň “Rawşan Kulob” hem-de Gyrgyz Respublikasynyň çempiony “Dordoý” bilen özara güýç synanyşar.
Toparlar toparçalarda özara bir gezek duşuşarlar. Duşuşyklar merkezileşdirilen görnüşde oýnalar. “E” hem-de “F” toparçalardaky oýunlar şu ýylyň 14-20-nji maýy aralygynda geçiriler. Toparçalarda 1-nji orny eýelän klublar ýaryşy dowam etdirerler. Zolaklaryň ýarym final awgust aýynda, ýaryşyň final duşuşygy-da şu ýylyň 26-njy noýabrynda oýnalar.
Merkezi zolak
“E” TOPARÇA
“Rawşan Kulob” (Täjigistan)
“Dordoý” (Gyrgyz Respublikasy)
“Ahal” (Türkmenistan)
“F” TOPARÇA
AGMK ýa-da “Nasaf” (Özbegistan)
“Altyn asyr” (Türkmenistan)
“Hojand” (Täjigistan)
“Alaý” (Gyrgyz Respublikasy)
